കൊൽക്കത്ത: പശ്ചിമ ബംഗാൾ തെരഞ്ഞെടുപ്പ് പരാജയത്തിന് പിന്നാലെ തൃണമൂൽ കോൺഗ്രസിലെ 20 ലോക്‌സഭാ എം.പിമാർ ഒരിടത്തും സീറ്റുകളില്ലാത്ത ഒരു പാർട്ടിയിൽ തങ്ങൾ ലയിച്ചതായി പ്രഖ്യാപിച്ച നടപടി, രാജ്യത്ത് നിലവിലുള്ള കൂറുമാറ്റ നിരോധന നിയമത്തിലെ ഭരണഘടനാപരമായ സങ്കീർണ്ണതയിലേക്കാണ് വിരൽ ചൂണ്ടുന്നത്. കേവലം ഒരു പാർട്ടിയിലെ പിളർപ്പ് എന്നതിനപ്പുറം, പാർലമെന്ററി ജനാധിപത്യത്തിന്റെ അടിത്തറയെ തന്നെ പുനർനിർവ്വചിക്കാൻ പോന്ന ചില നിയമപരമായ ചോദ്യങ്ങളാണ് ഈ നീക്കം ഉയർത്തുന്നത്.

കൂറുമാറ്റ നിരോധന നിയമത്തിലെ അയോഗ്യതാ നടപടികളിൽ നിന്നും രക്ഷപ്പെടാനായി തൃണമൂൽ കോൺഗ്രസിന്റെ 20 വിമത ലോക്‌സഭാ എം.പിമാർ രാജ്യത്ത് ഒരിടത്തുപോലും ഒരൊറ്റ ജനപ്രതിനിധി പോലുമില്ലാത്ത രാഷ്ട്രീയ സംഘടനയായ 'നാഷണലിസ്റ്റ് സിറ്റിസൺസ് പാർട്ടി ഓഫ് ഇന്ത്യ' (NCPI) എന്ന പാർട്ടിയിൽ തങ്ങൾ ലയിച്ചതായി സ്പീക്കർ ഓം ബിർളയ്ക്ക് കത്ത് നൽകി. ഏതാനും ആഴ്ചകൾക്ക് മുൻപ് രാജ്യസഭയിൽ ആം ആദ്മി പാർട്ടിയുടെ ഏഴ് എം.പിമാർ സമാനമായ രീതിയിൽ ബിജെപിയിൽ ലയിച്ചതിന് പിന്നാലെയാണ് പാർലമെന്റിനെ ഉലച്ച ഈ രണ്ടാം നീക്കം.

തൃണമൂൽ കോൺഗ്രസിന്റെ ലോക്‌സഭയിലെ ചീഫ് വിപ്പ് പദവിയിൽ നിന്നും നീക്കപ്പെട്ട കാകലി ഘോഷ് ദസ്തിദാർ ആണ് ഈ കലാപത്തിന് മുന്നിൽ നിന്ന് നേതൃത്വം നൽകിയത്. മുൻ സഭാകക്ഷി നേതാവ് സുദീപ് ബന്ദേപാധ്യായ, ഉപനേതാവ് ശതാബ്ദി റോയ് എന്നിവർക്കൊപ്പം പ്രശസ്ത ചലച്ചിത്ര താരങ്ങളായ ദീപക് അധികാരി (ദേവ്), സായോനി ഘോഷ്, ജൂൺ മാലിയ, മുൻ ഇന്ത്യൻ ക്രിക്കറ്റ് താരം യൂസഫ് പഠാൻ, മുൻ ഇന്ത്യൻ ഫുട്ബോൾ ക്യാപ്റ്റൻ പ്രസൂൺ ബാനർജി എന്നിവരുൾപ്പെടെയുള്ള വലിയൊരു നിര തന്നെയാണ് മമതയെ കൈവിട്ടത്. ഇതിൽ 19 എം.പിമാർ നേരിട്ടെത്തി സ്പീക്കർക്ക് കത്ത് നൽകിയപ്പോൾ, മലേഷ്യയിലുള്ള ഇരുപതാമത്തെ എം.പി രചന ബാനർജി തന്റെ സമ്മതപത്രം പ്രത്യേകമായി അയച്ചുകൊടുക്കുകയായിരുന്നു.

ലയനത്തിന് പിന്നിലെ രാഷ്ട്രീയ തന്ത്രം

വിമതർ ലയിച്ച എൻസിപിഐ എന്നത് 2022-ൽ രജിസ്റ്റർ ചെയ്ത, നിലവിൽ ഇന്ത്യയിലെ ഒരു തദ്ദേശ സ്ഥാപനത്തിൽ പോലും സീറ്റുകളില്ലാത്ത അംഗീകാരമില്ലാത്ത ഒരു ചെറിയ സംഘടനയാണ്. 2023-ലെ ത്രിപുര നിയമസഭാ തെരഞ്ഞെടുപ്പിൽ ഈ പാർട്ടി മത്സരിച്ച രണ്ട് സ്ഥാനാർത്ഥികൾക്കും കൂടി ആകെ ലഭിച്ചത് ആയിരത്തിൽ താഴെ വോട്ടുകൾ മാത്രമായിരുന്നു. പശ്ചിമ ബംഗാളുമായി ഈ സംഘടനയ്ക്കുള്ള ബന്ധവും വടക്കുകിഴക്കൻ സംസ്ഥാനങ്ങളിലേക്കുള്ള പ്രവേശന സാധ്യതയും മുൻനിർത്തിയാണ് ബിജെപി അനുകൂല നീക്കങ്ങളുടെ ഭാഗമായി ഈ പാർട്ടി തെരഞ്ഞെടുത്തതെന്ന് രാഷ്ട്രീയ വൃത്തങ്ങൾ സൂചിപ്പിക്കുന്നു. ഈ പാർട്ടിയുടെ വൈസ് പ്രസിഡന്റ് ഉത്തിയ കുന്ദു, ബംഗാൾ മുഖ്യമന്ത്രി സുവേന്ദു അധികാരിയുടെ വിശ്വസ്തനാണ്.

ലയനം ലോക്‌സഭാ സ്പീക്കർ ഔദ്യോഗികമായി അംഗീകരിച്ചാൽ തൃണമൂൽ കോൺഗ്രസിന് അത് കനത്ത തിരിച്ചടിയാകും. ലോക്‌സഭയിൽ പാർട്ടിയുടെ അംഗബലം 28-ൽ നിന്നും വെറും എട്ടായി ചുരുങ്ങും. രാജ്യസഭയിലും പാർട്ടിക്ക് ഇതിനകം സീറ്റുകൾ നഷ്ടപ്പെട്ടിട്ടുണ്ട്. ഇതോടെ കേന്ദ്രത്തിലെ ഭരണകക്ഷിയായ എൻഡിഎ ) സഖ്യത്തിന്റെ ലോക്‌സഭയിലെ സീറ്റുകളുടെ എണ്ണം 294-ൽ നിന്നും 314 ആയി ഉയരും.

നിയമപോരാട്ടത്തിനൊരുങ്ങി മമതയും സംഘവും

വിമതരുടെ ഈ നീക്കത്തിനെതിരെ തൃണമൂൽ കോൺഗ്രസ് അടിയന്തര നിയമനടപടികൾ ആരംഭിച്ചിട്ടുണ്ട്. ഭരണഘടനയുടെ പത്താം ഷെഡ്യൂൾ പ്രകാരം ജനപ്രതിനിധികളുടെ വെറുമൊരു 'പിളർപ്പ്' ഇപ്പോൾ നിയമപരമായി അനുവദനീയമല്ലെന്നും, തൃണമൂൽ കോൺഗ്രസ് ഒരൊറ്റ രാഷ്ട്രീയ പ്രസ്ഥാനമായി തുടരുകയാണെന്നും സഭാകക്ഷി നേതാവ് അഭിഷേക് ബാനർജി സ്പീക്കർക്ക് നൽകിയ കത്തിൽ ചൂണ്ടിക്കാട്ടി. 2023-ലെ മഹാരാഷ്ട്ര രാഷ്ട്രീയ പ്രതിസന്ധിയിലെ സുപ്രീം കോടതി വിധി ഉദ്ധരിച്ചുകൊണ്ടായിരുന്നു അദ്ദേഹത്തിന്റെ വാദം. ഔദ്യോഗിക രാഷ്ട്രീയ പാർട്ടിയുടെ കേന്ദ്ര നേതൃത്വത്തിന്റെ മുൻകൂർ അനുമതിയോ തീരുമാനമോ ഇല്ലാതെ, സഭയിലെ ജനപ്രതിനിധികളുടെ നിയമസഭാ കക്ഷിക്ക് മാത്രമായി സ്വയം മറ്റൊരു പാർട്ടിയിൽ ലയന തീരുമാനം എടുക്കാൻ ഭരണഘടനാപരമായി കഴിയില്ലെന്ന് അഭിഷേക് ബാനർജി കത്തിൽ വ്യക്തമാക്കുന്നു.

മുതിർന്ന അഭിഭാഷകനും എംപിയുമായ കപിൽ സിബലും ഈ നീക്കത്തെ ശക്തമായി എതിർത്തു. "വിമത എം.പിമാർക്ക് സ്വന്തം നിലയിൽ മറ്റൊരു രാഷ്ട്രീയ പാർട്ടിയിൽ ലയിക്കാൻ നിയമപരമായി കഴിയില്ല. ഔദ്യോഗിക തൃണമൂൽ കോൺഗ്രസ് പാർട്ടി ഉദ്ദേശിച്ചാൽ മാത്രമേ ലയനം സാധ്യമാകൂ. അതിനാൽ ഇവരെ അടിയന്തരമായി അയോഗ്യരാക്കണം," അദ്ദേഹം ആവശ്യപ്പെട്ടു. ആം ആദ്മി പാർട്ടി എം.പിമാരുടെ കൂറുമാറ്റത്തിനെതിരെ കോടതിയെ സമീപിച്ചതുപോലെ തൃണമൂലും ഈ വിഷയത്തിൽ സുപ്രീം കോടതിയെ സമീപിക്കാനാണ് സാധ്യത. നിലവിൽ ഗോവ അസംബ്ലിയിലെ സമാനമായ ഒരു കേസ് സുപ്രീം കോടതിയുടെ ഭരണഘടനാ ബെഞ്ചിന്റെ പരിഗണനയിലാണ്. സ്പീക്കർ ഓം ബിർള ഈ എംപിമാരുടെ ഒപ്പുകൾ പരിശോധിച്ച് അന്തിമ തീരുമാനം എടുക്കുന്നത് വരെ, ഇവർ സാങ്കേതികമായി തൃണമൂൽ കോൺഗ്രസിന്റെ വിപ്പിന് വിധേയരായിരിക്കും.