താലി മീൽസ് തന്നെ മുഴുവൻ കഴിച്ചുതീർക്കാൻ അത്ര എളുപ്പമല്ല അപ്പോഴാണ് ബാഹുബലി താലി! എന്നാൽ ഈ ഭീമൻ താലി മുഴുവൻ കഴിച്ചുതീർത്താൽ എട്ട് ലക്ഷം രൂപയാണ് പാരിതോഷികം. വിശക്കുന്നുണ്ടോ എന്ന് ചോദിച്ച് ബ്ലോഗർ രജ്‌നേഷ് ഗ്യാനി എന്നയാളാണ് ഈ വിഡിയോ പങ്കുവച്ചിരിക്കുന്നത്.

ന്യൂഡൽഹിയിലുള്ള അർഡോർ 2.1 എന്ന ഹോട്ടലിലാണ് ഈ ചലഞ്ച് നടന്നത്. നാൽപത് മിനിറ്റിനുള്ളിൽ ബാഹുബലി താലി അകത്താക്കിയാലാണ് സമ്മാനം ലഭിക്കുക. രജ്‌നേഷും ഒരു സുഹൃത്തും ചലഞ്ചിൽ പങ്കെടുക്കുന്നതാണ് വിഡിയോയിലുള്ളത്. പനീർ ടിക്ക മസാല, ചോറ്, വെജിറ്റബിൾ ബിരിയാണി, മലായി കോഫ്ത, കടായി പനീർ, ദീൽ മഖിനി തുടങ്ങി നിരവധി വിഭവങ്ങളാണ് ഈ ഭീമൻ താലിയിൽ ഉൾപ്പെട്ടിരുന്നത്. 

രജ്‌നേഷും സുഹൃത്തും ചലഞ്ച് പൂർത്തിയാക്കുകയും പാരിതോഷികം നേടുകയും ചെയ്തു. എട്ട് ലക്ഷം രൂപ ലഭിച്ചെങ്കിലും പണം ചാരിറ്റിക്കായി വിനിയോഗിക്കുമെന്ന് ഇവർ പറഞ്ഞു.