ന്യൂഡൽഹി: കൊലപാതക കേസിൽ ഇന്ത്യൻ ​ഗുസ്തി താരം സുശീൽ കുമാർ ഒളിവിലെന്ന് ഡൽഹി പൊലീസ്. മുൻ ദേശിയ ജൂനിയർ ചാമ്പ്യൻ സാ​ഗർ കുമാർ(23)ന്റെ കൊലപാതകവുമായി ബന്ധപ്പെട്ടാണ് സുശീലിനെതിരെ അന്വേഷണം നടക്കുന്നത്.

സുശീലിന്റെ വീട്ടിൽ അന്വേഷണ സംഘം എത്തിയെങ്കിലും കണ്ടെത്താൻ കഴിഞ്ഞില്ലെന്ന് പൊലീസ് പറയുന്നു. ​ഗുസ്തി താരങ്ങൾ തമ്മിലുണ്ടായ സംഘർഷമാണ് കൊലപാതകത്തിന് പിന്നിലെന്നാണ് എഫ്ഐആർ. സംഘർഷം നടന്ന സ്ഥലത്ത് നിന്നും ഒരു തോക്കും പൊലീസ് കണ്ടെടുത്തിരുന്നു. 

​ഗുസ്തിയിൽ ഇന്ത്യയുടെ അഭിമാനമായ താരമാണ് സുശീൽ. രണ്ട് തവണ സുശീലിലൂടെ ഇന്ത്യ ഒളിംപിക്സ് മെഡൽ നേടി. ഛത്രാൽ സ്റ്റേഡിയത്തിലാണ് സംഘർഷം ഉണ്ടായത്. ചൊവ്വാഴ്ചയുണ്ടായ സംഭവത്തിൽ പല ​ഗുസ്തി താരങ്ങൾക്കും പരിക്കേറ്റു. എന്നാൽ കൊലപാതകത്തിൽ തനിക്കോ തന്റെ സംഘത്തിനോ ബന്ധമില്ലെന്നാണ് സുശീൽ കുമാറിന്റെ വിശദീകരണം.