ന്യൂഡല്‍ഹി: ഡല്‍ഹിയിലെ രാംലീല മൈതാനിയില്‍ നവംബര്‍ ഒന്നിന് നടന്ന ഇന്ത്യ സഖ്യത്തിന്റെ റാലിയില്‍ പങ്കെടുക്കാത്തതിനെ തുടര്‍ന്ന് ഏഴ് സംസ്ഥാനങ്ങളിലായി 200ലേറെ യൂത്ത് കോണ്‍ഗ്രസ് ഭാരവാഹികളെ സസ്‌പെന്‍ഡ് ചെയ്തു. മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ നടപടി ആവശ്യപ്പെട്ടും എസ്‌ഐആര്‍ നടപടികള്‍ക്കെതിരെയും പ്രതിപക്ഷം സംഘടിപ്പിച്ച റാലിയില്‍ പങ്കെടുക്കാത്തവര്‍ക്കെതിരെയാണ് സംഘടന അച്ചടക്കനടപടി സ്വീകരിച്ചത്. ഏഴ് സംസ്ഥാനങ്ങളിലായി കുറഞ്ഞത് 185 അംഗങ്ങളെ ഇതിനകം സസ്‌പെന്‍ഡ് ചെയ്തിട്ടുണ്ട്. ഇവരോട് വിശദീകരണം ആവശ്യപ്പെട്ടിട്ടുമുണ്ട്. അച്ചടക്ക നടപടികളുടെ ഭാഗമായി പുറത്താക്കപ്പെടുന്നവരുടെ എണ്ണം 500 വരെ ഉയര്‍ന്നേക്കാമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

അമ്മാവന്റെ മരണാനന്തര ചടങ്ങില്‍ പങ്കെടുക്കേണ്ടതിനാല്‍ ഡല്‍ഹിയിലെ റാലിയില്‍ എത്താന്‍ കഴിയാതിരുന്ന ജനറല്‍ സെക്രട്ടറി രോഹിത് രജോറിയയ്ക്കും നടപടി നേരിടേണ്ടിവന്നു. 15 വര്‍ഷമായി സംഘടനയ്ക്കുവേണ്ടി പ്രവര്‍ത്തിക്കുന്ന തന്നെ ഒരു പരിപാടിയില്‍ പങ്കെടുക്കാത്തതിന്റെ പേരില്‍ മാത്രം മാറ്റിനിര്‍ത്തിയതില്‍ രോഹിത് രജോറിയ അതൃപ്തി പ്രകടിപ്പിച്ചു. പാര്‍ട്ടിയുടെ പ്രതിഷേധങ്ങളില്‍ പങ്കെടുത്തതിന്റെ പേരില്‍ 15 കേസുകളില്‍ പ്രതിയായിട്ടുണ്ടെന്നും മൂന്നോ നാലോ തവണ ജയിലില്‍ കഴിഞ്ഞിട്ടുണ്ടെന്നും അദ്ദേഹം പറഞ്ഞു.

പതിമൂന്നാം ദിവസത്തെ സ്മരണച്ചടങ്ങില്‍ പങ്കെടുക്കേണ്ടതിനാലാണ് റാലിയില്‍ എത്താന്‍ കഴിയാതിരുന്നതെന്ന് രജോറിയ വ്യക്തമാക്കി. ഇക്കാര്യം പാര്‍ട്ടി നേതൃത്വത്തെ നേരത്തെ അറിയിച്ചിരുന്നതായും അദ്ദേഹം പറഞ്ഞു. ഇതുമായി ബന്ധപ്പെട്ട ചടങ്ങിന്റെ ക്ഷണക്കത്തും അദ്ദേഹം പുറത്തുവിട്ടു. ഒരു പരിപാടിയില്‍ പങ്കെടുക്കാത്തതിന്റെ പേരില്‍ വിശദീകരണം നല്‍കാന്‍ പോലും അവസരം നല്‍കാതെ സ്ഥാനത്തുനിന്ന് നീക്കിയ നടപടിയെയും അദ്ദേഹം ചോദ്യം ചെയ്തു. ഇത്തരം നടപടികളുമായി മുന്നോട്ടുപോയാല്‍ പാര്‍ട്ടിക്ക് എങ്ങനെയാണ് അധികാരത്തില്‍ തിരിച്ചെത്താനാകുകയെന്നും അദ്ദേഹം ചോദിച്ചു.

യൂത്ത് കോണ്‍ഗ്രസിന്റെ നടപടികളില്‍ ഏറ്റവും കൂടുതല്‍ പേര്‍ക്ക് സസ്‌പെന്‍ഷന്‍ ലഭിച്ചത് മധ്യപ്രദേശിലാണ്. ഇവിടെ 60 പേരെയാണ് സസ്‌പെന്‍ഡ് ചെയ്തത്. ഗുജറാത്തില്‍ 49 പേരും പശ്ചിമ ബംഗാളില്‍ 26 പേരും നടപടിക്ക് വിധേയരായി. തെലങ്കാനയില്‍ 14 പേരെയും ഉത്തര്‍പ്രദേശിന്റെ മധ്യമേഖലയില്‍ 13 പേരെയും കോണ്‍ഗ്രസ് ഭരിക്കുന്ന ഹിമാചല്‍ പ്രദേശില്‍ 13 പേരെയും ഹരിയാനയില്‍ 10 പേരെയും സസ്‌പെന്‍ഡ് ചെയ്തിട്ടുണ്ട്. റാലിക്ക് മുന്നോടിയായി ദേശീയ, സംസ്ഥാന, ജില്ലാ തലങ്ങളിലെ ഭാരവാഹികള്‍ നിര്‍ബന്ധമായും പങ്കെടുക്കണമെന്ന് യൂത്ത് കോണ്‍ഗ്രസ് നിര്‍ദേശം നല്‍കിയിരുന്നു.

റാലി വിജയകരമായിരുന്നുവെന്നും നിര്‍ദേശങ്ങള്‍ നല്‍കിയിട്ടും അച്ചടക്കം പാലിക്കാത്ത ഭാരവാഹികള്‍ക്കെതിരെയാണ് നടപടിയെടുത്തതെന്നും യൂത്ത് കോണ്‍ഗ്രസ് ദേശീയ പ്രസിഡന്റ് ഉദയ് ഭാനു ചിബ് പറഞ്ഞു. ഉത്തരവാദിത്തമില്ലാത്തവരെ മാറ്റി പകരം കഠിനാധ്വാനം ചെയ്യുന്ന പ്രവര്‍ത്തകര്‍ക്ക് ചുമതല നല്‍കാനാണ് തീരുമാനമെന്നും അദ്ദേഹം വ്യക്തമാക്കി. അതേസമയം, റാലിയില്‍ വലിയ ജനപങ്കാളിത്തമുണ്ടായെന്ന കോണ്‍ഗ്രസിന്റെ അവകാശവാദത്തെ ബിജെപി ചോദ്യം ചെയ്തു. വേദിയിലെ 40 ശതമാനം സ്ഥലവും ഒഴിഞ്ഞുകിടക്കുകയായിരുന്നുവെന്ന് ബിജെപി എംപി സാംബിത് പത്ര ആരോപിച്ചു. 28,000 കസേരകളില്‍ 5,000 മുതല്‍ 7,000 വരെ ഒഴിഞ്ഞുകിടന്നിരുന്നുവെന്നും അദ്ദേഹം പറഞ്ഞു.

കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, പശ്ചിമ ബംഗാള്‍ മുന്‍ മുഖ്യമന്ത്രി മമത ബാനര്‍ജി, സമാജ്വാദി പാര്‍ട്ടി അധ്യക്ഷന്‍ അഖിലേഷ് യാദവ്, ആര്‍ജെഡി നേതാവ് തേജസ്വി യാദവ്, നാഷണല്‍ കോണ്‍ഫറന്‍സ് അധ്യക്ഷന്‍ ഫാറൂഖ് അബ്ദുള്ള തുടങ്ങിയ ഇന്ത്യാ സഖ്യ നേതാക്കളും റാലിയില്‍ പങ്കെടുത്തിരുന്നു. ഇലക്ട്രോണിക് വോട്ടിങ് യന്ത്രങ്ങളിലും വോട്ടര്‍ പട്ടികയിലും വ്യാപകമായ ക്രമക്കേടുകള്‍ നടക്കുന്നുണ്ടെന്ന് രാഹുല്‍ ഗാന്ധി റാലിയില്‍ ആരോപിച്ചിരുന്നു.

കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, പശ്ചിമ ബംഗാള്‍ മുഖ്യമന്ത്രി മമത ബാനര്‍ജി, സമാജ്വാദി പാര്‍ട്ടി അധ്യക്ഷന്‍ അഖിലേഷ് യാദവ് തുടങ്ങിയ പ്രമുഖ പ്രതിപക്ഷ നേതാക്കള്‍ റാലിയില്‍ പങ്കെടുത്തിരുന്നു. ബിജെപിയും തെരഞ്ഞെടുപ്പ് കമ്മീഷനും ജനാധിപത്യ സ്ഥാപനങ്ങളെ ദുര്‍ബലപ്പെടുത്തുകയാണെന്നും തെരഞ്ഞെടുപ്പില്‍ വോട്ട് മോഷണം നടക്കുന്നുവെന്നും നേതാക്കള്‍ ആരോപിച്ചു.