ലക്‌നൗ:  മദ്യലഹരിയില്‍ ജീവനുള്ള വിഷപ്പാമ്പിനെ വിഴുങ്ങിയ ആള്‍ മരിച്ചു. ഉത്തര്‍പ്രദേശിലെ അംറോഹ ജില്ലയിലാണ് സംഭവം. മഹിപാല്‍ സിംഗ് എന്ന നാല്പതുകാരനാണ് ഗ്രാമീണരുടെ പ്രകോപനത്തില്‍ മതിമറന്ന് ജീവനുള്ള പാമ്പിനെ വിഴുങ്ങിയത്. മദ്യപിച്ച് ലക്കുകെട്ട മഹിപാല്‍ നടന്നുവരുമ്പോള്‍, റോഡരികില്‍ കിടന്ന പാമ്പിനെ കണ്ടു. 

തുടര്‍ന്ന് ഇയാള്‍ പാമ്പിനെ എടുത്ത് കളിപ്പിക്കാന്‍ തുടങ്ങി. ഇതോടെ തടിച്ചുകൂടിയ ഗ്രാമീണര്‍ ഇയാളെ പ്രോല്‍സാഹിപ്പിക്കുകയും, ദൃശ്യങ്ങള്‍ മൊബൈല്‍ ഫോണില്‍ പകര്‍ത്തുകയും ചെയ്തു. ജനങ്ങളുടെ ശ്രദ്ധ കിട്ടിയ ആവേശത്തില്‍ മഹിപാല്‍ സിംഗ് വിഷപ്പാമ്പിനെ എടുത്ത് തലയില്‍ വെക്കുകയും ചെയ്തു. 

ഇതിനിടെ ഒരാള്‍ പാമ്പിനെ വായില്‍ വെക്കാമോ എന്ന് ചോദിച്ചു. ചോദ്യം കേട്ടപടി ലഹരി മൂത്ത മഹിപാല്‍ പാമ്പിനെ വായില്‍ വെച്ചു. എന്താണ് സംഭവിക്കുന്നതെന്ന് മനസ്സിലാകുന്നതിന് മുമ്പെ, എങ്ങനെയോ പാമ്പ് ഇയാളുടെ അന്നനാളത്തിലേക്ക് ഇറങ്ങിപ്പോയി. 

വീട്ടിലെത്തിയ ഇയാള്‍ക്ക് ദേഹാസ്വാസ്ഥ്യം അനുഭവപ്പെട്ടു. നിരവധി തവണ ഛര്‍ദിച്ചെങ്കിലും പാമ്പ് മാത്രം പുറത്തുവന്നില്ല. നാലു മണിക്കൂറിനകം ഇയാള്‍ മരിക്കുകയായിരുന്നു. വിഷബാധയാണ് മരണകാരണമെന്നാണ് വിലയിരുത്തല്‍.