ബെംഗളൂരു: അമ്മയെ ഉപേക്ഷിച്ച് മറ്റൊരു സ്ത്രീയെ വിവാഹംകഴിച്ച വിരോധത്തിൽ പതിനാറുകാരൻ അച്ഛനെ കുത്തിക്കൊന്നു. 47കാരനായ ബെംഗളൂരു കലാശിപാളയ സ്വദേശി സയിദ് മുസ്തഫയാണ് കുത്തേറ്റുമരിച്ചത്. 

നാലുമാസങ്ങൾക്കുമുമ്പാണ് ടാക്സി ഡ്രൈവറായ സയിദ് മുസ്തഫ മറ്റൊരു വിവാഹംകഴിച്ചത്. ഇതിനുശേഷം മുസ്തഫയും മകനും തമ്മിൽ കാണുകയോ സംസാരിക്കുകയോ ചെയ്തിരുന്നില്ല. കഴിഞ്ഞദിവസം പിതൃമാതാവിനെ കാണാൻ മകൻ എത്തിയപ്പോൾ മുസ്തഫയും അവിടെയുണ്ടായിരുന്നു. അവിടെവച്ച് ഇരുവർക്കുമിടയിൽ വാക്കേറ്റമുണ്ടായി. ഇതിനിടയിലാണ് മകൻ മുസ്തഫയെ കുത്തിയത്. ബന്ധുക്കളും അയൽക്കാരുംചേർന്ന് ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സംഭവത്തിനുശേഷം ബന്ധുവീട്ടിലേക്കുപോയ കുട്ടിയെ പൊലീസ് പിടികൂടി. കുറ്റംസമ്മതിച്ച കുട്ടി എതിർപ്പുകളൊന്നുമില്ലാതെ പൊലീസിനൊപ്പം പോയി. കുട്ടിയെ ദുർഗുണപരിഹാരപാഠശാലയിലേക്ക് അയച്ചു.