ന്യൂഡല്‍ഹി: വിജയ് മല്യയുടെ വെളിപ്പെടുത്തലുകളുടെ പശ്ചാത്തലത്തില്‍ ധനമന്ത്രി അരുണ്‍ ജയ്റ്റ്‌ലി രാജിവയ്ക്കണമെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. സംഭവത്തില്‍ പ്രധാനമന്ത്രി സ്വതന്ത്രാന്വേഷണം പ്രഖ്യാപിക്കണമെന്നും അദ്ദേഹം ആവശ്യപ്പെട്ടു.   ട്വിറ്ററിലാണ് രാഹുല്‍ ഗാന്ധി ഈ ആവശ്യം ഉന്നയിച്ചത്.
 രാജ്യം വിടുന്നതിന് മുമ്പ് ധനകാര്യമന്ത്രി അരുണ്‍ ജയ്റ്റ്‌ലിയുമായി കൂടിക്കാഴ്ച നടത്തിയിരുന്നുവെന്നാണ് മല്യ വെളിപ്പെടുത്തിയിരുന്നത്.

സാമ്പത്തിക ഇടപാടുകള്‍ രമ്യമായി പരിഹരിക്കുന്നതിനാണ് മന്ത്രിയുമായി കൂടിക്കാഴ്ച നടത്തിയത്. താന്‍ മുന്നോട്ട് വച്ച ഒത്തുതീര്‍പ്പ് നീക്കങ്ങള്‍ ബാങ്ക് അധികൃതര്‍ തടഞ്ഞിരുന്നുവെന്നും മല്യ ആരോപിച്ചിരുന്നു.

 എന്നാല്‍ അടിസ്ഥാന രഹിതമായ ആരോപണങ്ങളാണ് മല്യ ഉന്നയിക്കുന്നതെന്ന് ജയ്റ്റ്‌ലി പ്രതികരിച്ചു. കൂടിക്കാഴ്ചയ്ക്കായി സമയം പോലും അനുവദിച്ചിരുന്നില്ല. പാര്‍ലമെന്റ് ലോബിയില്‍ വച്ചാണ് തമ്മില്‍ കണ്ടതെന്ന് അദ്ദേഹം കൂട്ടിച്ചേര്‍ത്തു.

പൊതുമേഖലാ ബാങ്കുകളില്‍ നിന്നടക്കം കോടികളുടെ വായ്പയെടുത്ത് തിരിച്ചടയ്ക്കാതെ മുങ്ങിയ മല്യ ഇപ്പോള്‍ ഇംഗ്ലണ്ടിലാണുള്ളത്. ഇവിടെ നിന്ന് മല്യയെ ഇന്ത്യയിലേക്കെത്തിക്കുന്നത് സംബന്ധിച്ച കേസില്‍ വെസ്റ്റ് മിന്‍സ്റ്റര്‍ മജിസ്‌ട്രേറ്റ് കോടതിയില്‍ ഹാജരാക്കിയപ്പോഴാണ് മല്യ ആരോപണം ഉന്നയിച്ചത്.