ന്യൂഡല്‍ഹി: മുതിര്‍ന്ന ബിജെപി നേതാവും മുന്‍ ധനമന്ത്രിയുമായ അരുണ്‍ ജെയ്റ്റ്‌ലിയെ പ്രവേശിപ്പിച്ച ഡല്‍ഹി എയിംസ് ആശുപത്രിയില്‍ തീപിടിത്തം. ശനിയാഴ്ച വൈകുന്നേരത്തോടെ അത്യാഹിത വിഭാഗത്തിന് സമീപത്തുള്ള കെട്ടിടത്തിലാണ് തീപിടിത്തമുണ്ടായത്. 39അഗ്നിശമന യൂണിറ്റികളുടെ സഹായത്തോടെ തീ പൂര്‍ണമായും അണക്കാനുള്ള ശ്രമം തുടരുകയാണ്.  

ഈ കെട്ടിടത്തിലുള്ള ആളുകളെ ഒഴിപ്പിച്ചു്. ജെയ്റ്റ്‌ലി ചികിത്സയില്‍ കഴിയുന്ന കെട്ടിടത്തിലല്ല അപകടം നടന്നതെന്ന് ആശുപത്രി അധികൃതര്‍ വ്യക്തമാക്കി. 

അത്യാഹിത വിഭാഗത്തിന്റെ ലാബ് അടച്ചു. പ്രദേശത്ത് മുഴുവന്‍ കനത്ത പുക പടര്‍ന്നിരിക്കുകയാണ്.  കാര്‍ഡിയാക് ന്യൂറോ സെന്ററിലെ ഐസിയുവിലാണ് ജെയ്റ്റ്‌ലിയെ പ്രവേശിപ്പിച്ചിരിക്കുന്നത്. തീപിടിത്തത്തിന്റെ കാരണം എന്തെന്ന് വ്യക്തമായിട്ടില്ലെന്ന് അഗ്നി ശമന സേന അറിയിച്ചു.