ന്യൂഡല്‍ഹി : ബിജെപി വീണ്ടും കേന്ദ്രത്തില്‍ അധികാരത്തിലെത്തിയാല്‍ ഹിന്ദു, ബുദ്ധ, സിഖ് മത വിശ്വാസികള്‍ ഒഴികെയുള്ള എല്ലാ നുഴഞ്ഞു കയറ്റക്കാരെയും രാജ്യത്ത് നിന്നും തുരത്തുമെന്ന ബിജെപി ദേശീയ അധ്യക്ഷന്‍ അമിത് ഷായുടെ പ്രസ്താവനയ്‌ക്കെതിരെ നടി പൂജാ ഭട്ട് രംഗത്തെത്തി. ട്വീറ്റിലൂടെയാണ് പൂജ അമിത് ഷായുടെ പ്രസ്താവനക്കെതിരെ രൂക്ഷവിമര്‍ശനം ഉന്നയിച്ചത്. 

'ഇത് വര്‍ഗീയമല്ലെങ്കില്‍ പിന്നെന്താണെന്ന് എനിക്കറിയില്ല. ഇത് സമൂഹത്തില്‍ വിഭജനം സൃഷ്ടിക്കുന്നതല്ലെങ്കില്‍ പിന്നെന്താണെന്ന് എനിക്കറിയില്ല. ഇത് വിദ്വേഷ രാഷ്ട്രീയമല്ലെങ്കില്‍ പിന്നെ എന്താണെന്ന് എനിക്കറിയില്ല. ഇതാണോ ഇന്ത്യ? മതേതര ഇന്ത്യയെന്ന ആശയം ഹൈജാക്ക് ചെയ്യപ്പെട്ടിരിക്കുന്നു' പൂജാ ഭട്ട് ട്വീറ്റ് ചെയ്തു.

അമിത് ഷായുടെ പ്രസ്താവനക്കെതിരെ നടി ആലിയ ഭട്ടിന്റെ അമ്മ സോണി റസ്ദാനും രംഗത്തെത്തി. 

'ഞാന്‍ വായിച്ചതില്‍ വെച്ച് ഏറ്റവും മോശമായ കാര്യമാണിത്. ഈ പറഞ്ഞത് തന്നെയാണ് അവര്‍ ഉദ്ദേശിച്ചതെങ്കില്‍ ദൈവത്തിനു മാത്രമേ ഇന്ത്യയെ രക്ഷിക്കാന്‍ കഴിയൂ!' എന്നാണ് സോണി റസ്ദാന്‍ ട്വീറ്റു ചെയ്തത്.

ഡാര്‍ജിലിങില്‍ തെരഞ്ഞെടുപ്പ് പ്രചാരണത്തിനിടെയാണ് അമിത് ഷാ വിവാദ പരാമര്‍ശം നടത്തിയത്.