ഡെറാഡൂണ്‍: ഉത്തരാഖണ്ഡിലെ പൗരിഗര്‍വാള്‍ ജില്ലയിലുണ്ടായ ബസപകടത്തില്‍ മരിച്ചവരുടെ എണ്ണം 48 ആയി. ഇന്ന് രാവിലെയാണ് ബസ് കൊക്കയിലേക്ക് മറിഞ്ഞത്. 45 പേര്‍ സംഭവസ്ഥലത്തും മൂന്ന് പേര്‍ ആശുപത്രിയില്‍ വച്ചുമാണ് മരിച്ചത്. 28 പേരെ കൊള്ളുന്ന ബസില്‍ 50 പേര്‍ ഉണ്ടായിരുന്നുവെന്നാണ് പൊലീസ് പറയുന്നത്. രാംനഗറില്‍ നിന്നും ഭുവനിലേക്ക് പോയ ബസാണ് നിയന്ത്രണം വിട്ട് 700 അടി താഴ്ചയുള്ള കൊക്കയിലേക്ക് മറിഞ്ഞത്. 

പരിക്കേറ്റവരുടെ നില ഗുരുതരമായതിനാല്‍ മരണസംഖ്യ ഇനിയം ഉയര്‍ന്നേക്കാമെന്ന് ഗര്‍വാള്‍ കമ്മീഷണര്‍ ദിലിപ് ജവള്‍ക്കര്‍ പറഞ്ഞു.പൊലീസും ദേശീയ ദുരന്തനിവാരണ സേനയും ചേര്‍ന്നാണ് രക്ഷാപ്രവര്‍ത്തനം നടത്തിയത്.

അപകടത്തില്‍ ഉത്തരാഖണ്ഡ് മുഖ്യമന്ത്രി ത്രിവേന്ദ്രസിങ് റാവത്ത് അനുശോചനം അറിയിച്ചു. മരിച്ചവരുടെ കുടുംബങ്ങള്‍ക്ക് രണ്ട് ലക്ഷം രൂപവീതവും പരിക്കേറ്റവര്‍ക്ക് 50,000 രൂപ വീതവും അടിയന്തര സഹായം നല്‍കുമെന്ന് മുഖ്യമന്ത്രി പ്രഖ്യാപിച്ചു.