പട്‌ന​: എല്ലാ മോദിമാരും കള്ളന്മാരാണ്(സാരേ മോദി ചോര്‍ ഹേ) എന്ന രാഹുല്‍ ഗാന്ധിയുടെ പരാമര്‍ശത്തിനെതിരായ അപകീര്‍ത്തി കേസില്‍ പട്‌ന കോടതി കോണ്‍ഗ്രസ് അധ്യക്ഷന് സമന്‍സയച്ചു. മെയ് 20ന് കോടതിയില്‍ നേരിട്ട് ഹാജരാകണമെന്നാണ് കോടതിയുടെ നിര്‍ദേശം. ബിഹാര്‍ ഉപമുഖ്യമന്ത്രിയും ബിജെപി നേതാവുമായി സുശീല്‍ മോദി കൊടുത്ത പരാതിയിലാണ് കോടതി നടപടി. 

കള്ളന്മാരുടെ പേരിന്റെ കൂടെയെല്ലാം മോദി എന്നു വരുന്നതെ എങ്ങനെയാണ്. നീരവ് മോദി, ലളിത് മോദി, നരേന്ദ്ര മോദി എന്നിവര്‍ക്കെല്ലാം മോദി എങ്ങനെ കിട്ടി. ഇനി എത്ര മോദിമാര്‍ വരാനിരിക്കുന്നുവെന്നു ആര്‍ക്കുമറിയില്ല എന്നായിരുന്നു രാഹുലിന്റെ പരാമര്‍ശം. ഇതിനെതിടെ ലളിത് മോദി രംഗത്ത് വന്നിരുന്നു. ഇതിന് പിന്നാലെയാണ് സുശീല്‍ മോദി മാനനഷ്ടക്കേസുമായി എത്തിയത്. 

രാഹുലിന്റെ പരാമര്‍ശത്തിന് എതിരെ ഭോപ്പാല്‍ സ്വദേശി പ്രദീപ് മോദിയും അപകീര്‍ത്തി കേസ് കൊടുത്തിട്ടുണ്ട്. രാഹുലിന്റെ പരാമര്‍ശം കാരണം താന്‍ ഒരുപാട് അപമാനം സഹിക്കേണ്ടി വന്നുവെന്നും എല്ലാവരും തന്നോട് താന്‍ കള്ളനാണോയെന്ന് ചോദിച്ചെന്നും പ്രദീപ് മോദി പറയുന്നു. അപമാനം താങ്ങാന്‍ വയ്യാതെയാണ് താന്‍ കേസ് കൊടുക്കാന്‍ തീരുമാനിച്ചതെന്നും ഇയാള്‍ പറഞ്ഞു.