ന്യൂഡല്‍ഹി: ലോക്ക്ഡൗണിനെ തുടര്‍ന്ന് സ്റ്റാഫ് സെലക്ഷന്‍ കമ്മിഷന്‍ (എസ്എസ്‌സി) നടത്താനിരുന്ന പരീക്ഷകളുടെ തീയതികള്‍ പുനഃക്രമീകരിക്കും. സ്റ്റാഫ് സെലക്ഷന്‍ കമ്മിഷന്റെ പ്രത്യേക യോഗത്തിലാണ് തീരുമാനം. അപേക്ഷകര്‍ക്ക് പരീക്ഷാകേന്ദ്രങ്ങളില്‍ എത്തിച്ചേരാന്‍ കഴിയാത്തത് കണക്കിലെടുത്താണിത്.

കംബൈന്‍ഡ് ഹയര്‍ സെക്കന്‍ഡറി (10+2) തല പരീക്ഷ (ടയര്‍1) 2019, ജൂനിയര്‍ എന്‍ജിനീയര്‍ (പേപ്പര്‍1) പരീക്ഷ 2019, സ്‌റ്റെനോഗ്രാഫര്‍ ഗ്രേഡ് സി, ഡി പരീക്ഷ, 2019, 2018ലെ കംപെയിന്‍ഡ് ഹയര്‍ സെക്കന്‍ഡറി തല പരീക്ഷയുടെ സ്‌കില്‍ ടെസ്റ്റ് എന്നിവയുടെ പുതുക്കിയ തീയതികളെ സംബന്ധിച്ച തീരുമാനം മേയ് മൂന്നിനുശേഷം കൈക്കൊള്ളും. പുതുക്കിയ പരീക്ഷാ തീയതികള്‍ സ്റ്റാഫ് സെലക്ഷന്‍ കമ്മിഷന്റെയും, റീജനല്‍/സബ് റീജനല്‍ ഓഫിസുകളുടെയും വെബ്‌സൈറ്റുകളില്‍ വിജ്ഞാപനം ചെയ്യും.

മറ്റു പരീക്ഷകളുടെ പട്ടിക സംബന്ധിച്ച കമ്മിഷന്റെ വാര്‍ഷിക കലണ്ടറും പുനഃപരിശോധിക്കും. കോവിഡ് പ്രതിസന്ധിയുടെ പശ്ചാത്തലത്തില്‍ എസ്എസ്‌സി ഉദ്യോഗസ്ഥരും ജീവനക്കാരും തങ്ങളുടെ ഒരു ദിവസത്തെ ശമ്പളം പി.എം കെയേഴ്‌സ് ഫണ്ടിലേക്ക് സംഭാവന ചെയ്യാനും തീരുമാനിച്ചു.