പൂനെ: പ്രേമത്തിന് കണ്ണില്ലെന്ന് കേട്ടിട്ടില്ലേ, അങ്ങനെ അസ്ഥിക്ക് പിടിച്ച പ്രേമം  എംബിഎ വിദ്യാര്‍ത്ഥിയായ യുവാവിനെ പൊലീസ് സ്റ്റേഷനില്‍ കയറ്റിയെന്നാണ് പൂനെയില്‍ നിന്നുള്ള റിപ്പോര്‍ട്ടുകള്‍. കാമുകിയുടെ സൗന്ദര്യപ്പിണക്കം മാറ്റാന്‍ അവളുടെ വീട്ടിലേക്കുള്ള വഴിയിലെ വൈദ്യുത പോസ്റ്റുകളില്‍ ഫ്‌ളക്സ് വച്ചാണ് ഖേദേക്കര്‍ എന്ന കാമുകന്‍ വാര്‍ത്തകളില്‍ ഇടം പിടിച്ചത്. 72,000 രൂപയാണ് സ്വന്തം കീശയില്‍ നിന്നും യുവാവ് ഇതിനായി ചിലവാക്കിയതെന്ന് പൊലീസ് പറയുന്നു.

 പൂനെയിലെ പിംപ്രിയില്‍ മുന്നൂറോളം ബോര്‍ഡുകളാണ് ഖേദേക്കറും സുഹൃത്തുക്കളും സ്ഥാപിച്ചത്. ഐ ആം സോറി ശിവദേ എന്ന് കറുത്ത അക്ഷരങ്ങളിലാണ് പ്രിന്റ് ചെയ്തിരുന്നത്. ചുവന്ന ഹൃദയ ചിഹ്നവും ഇതോടൊപ്പം പ്രിന്റ് ചെയ്തിരുന്നു.

രാവിലെ വ്യത്യസ്തമായൊരു ഫ്‌ളക്‌സ് കണ്ട നാട്ടുകാര്‍ പൊലീസില്‍ അറിയിച്ചതോടെയാണ് ഖേദേക്കര്‍ കുടുങ്ങിയത്. കോര്‍പറേഷന്‍ അധികൃതര്‍ നല്‍കിയ പരാതിയില്‍ നിയമ നടപടികള്‍തുടരുമെന്ന് പൊലീസ് അറിയിച്ചു.