ന്യൂഡല്‍ഹി : പ്രളയം തകര്‍ത്തെറിഞ്ഞ കേരളത്തിന് സഹായ ഹസ്തവുമായി സുപ്രീംകോടതി ജഡ്ജിമാരും. മുഖ്യമന്ത്രിയുടെ ദുരിതാശ്വാസ നിധിയിലേക്ക് 25,000 രൂപ വീതം നല്‍കാനാണ് ചീഫ് ജസ്റ്റിസ് ദീപക് മിശ്രയും, സുപ്രീംകോടതി ജഡ്ജിമാരും തീരുമാനിച്ചത്. 

നേരത്തെ സുപ്രീംകോടതിയിലെ അഭിഭാഷകരുടെ നേതൃത്വത്തില്‍ ഡല്‍ഹിയില്‍ നിന്നും, കേരളത്തിലേക്ക് ദുരിതാശ്വാസ സാമഗ്രികള്‍ ശേഖരിച്ചിരുന്നു. അഞ്ച് ലോഡ് സാധനങ്ങള്‍ ശേഖരിക്കാനാണ് ലക്ഷ്യമിട്ടത്. എന്നാല്‍ ഏഴു ലോഡ് സാധനങ്ങളാണ് ലഭിച്ചത്. സുപ്രീംകോടതി ജഡ്ജി ജസ്റ്റിസ് കുര്യന്‍ ജോസഫ് ഈ പ്രവര്‍ത്തനങ്ങള്‍ക്ക് നേതൃത്വം നല്‍കിയത്. 

പ്രളയം തകര്‍ത്തെറിഞ്ഞ കേരളത്തിന്റെ പുനര്‍നിര്‍മ്മാണത്തിനായി, വിവിധ സംസ്ഥാനങ്ങളും, സംഘടനകളും, നിരവധി സിനിമാ-വ്യവസായ പ്രമുഖരുമെല്ലാം സംഭാവനകള്‍ നല്‍കി വരികയാണ്. പ്രളയക്കെടുതിയില്‍ കേരളത്തിന് ഏകദേശം 20,000 കോടിയുടെ നാശനഷ്ടം ഉണ്ടായതായാണ് പ്രാഥമിക വിലയിരുത്തല്‍.