ഇന്‍ഡോര്‍: ഒരു വയസുകാരിയായ പെണ്‍കുട്ടിയെ നിര്‍മാണത്തിലിരിക്കുന്ന കെട്ടിടത്തില്‍ വച്ച് അമ്മാവന്‍ ബലാത്സംഗം ചെയ്തു. മധ്യപ്രദേശിലെ സുതാര്‍ ഗല്ലിയിലാണ് സംഭവം. നാലു വയസുകാരിയായ സഹോദരിയാണ് മാതാപിതാക്കളെ വിവരമറിയിച്ചത്.

സംഭവമറിഞ്ഞ് ഓടിയെത്തിയപ്പോള്‍ ഇളയമകള്‍ അബോധാവസ്ഥയില്‍ കിടക്കുന്നതാണ് മാതാപിതാക്കള്‍ കണ്ടത്. കുറച്ച് ദൂരെയായി കുട്ടിയുടെ വസ്ത്രങ്ങള്‍ മാറ്റിയിട്ടിരുന്നതായും മകളുടെ സ്വകാര്യഭാഗങ്ങളില്‍ രക്തം കണ്ടതായും മാതാപിതാക്കള്‍ പറഞ്ഞു.

അമ്മാവനാണ് ഉറങ്ങുന്നതിനിടയില്‍ തങ്ങളെ ഇരുവരെയും താഴേക്ക് കൂട്ടികൊണ്ടുവന്നതെന്ന് മൂത്ത കുട്ടി പൊലീസിനോട് പറഞ്ഞു. ഇയാള്‍ ആദ്യം മൂത്ത കുട്ടിയുടെ വസ്ത്രം മാറ്റാന്‍ ശ്രമിച്ചെന്നും എന്നാല്‍ കുട്ടി ഓടി രക്ഷപെടാന്‍ ശ്രമിച്ചതോടെ ഇളയ കുട്ടിയെ ആക്രമിക്കുകയായിരുന്നെന്നും മാതാപിതാക്കള്‍ പൊലീസിന് നല്‍കിയ പരാതിയില്‍ പറയുന്നു.

സംഭവവുമായി ബന്ധപ്പെട്ട് ഇവരുടെ ബന്ധുക്കളായ നാല് യുവാക്കളെ പൊലീസ് ചോദ്യം ചെയ്തു. ഐപിസി376, 366 വകുപ്പുകള്‍ പ്രകാരം കേസെടുത്തിട്ടുണ്ടെന്നും സിസിടിവി ദൃശ്യങ്ങളടക്കം പരിശോധിച്ചശേഷം പ്രതിയെ പിടികൂടുമെന്ന് പൊലീസ് അറിയിച്ചു.