ചെന്നൈ: കോവിഡ് സ്ഥിരീകരിച്ച കോണ്‍ഗ്രസ് നേതാവും കന്യാകുമാരി എംപിയുമായ വസന്ത് കുമാര്‍ കോവിഡ് ബാധിച്ച് മരിച്ചു.  ചെന്നൈ അപ്പോളോ ആശുപത്രിയില്‍ ചികിത്സയിലായിരുന്നു. 70 വയസായിരുന്നു.

വൈകീട്ടോടെ അദ്ദേഹത്തിന്റെ ആരോഗ്യനില അതീവ വഷളായാതായി ആശുപത്രിയിറക്കിയ മെഡിക്കല്‍ ബുള്ളറ്റിനില്‍ വ്യക്തമാക്കിയിരുന്നു. 
എക്‌മോ ചികിത്സ ആരംഭിച്ചെങ്കിലും ജീവന്‍ നിലനിര്‍ത്താനായില്ല.

ഈ മാസം ആദ്യമാണ് കോവിഡ് രോഗലക്ഷണങ്ങളുള്ളതിനാല്‍ അദ്ദേഹത്തെ ആശുപത്രിയില്‍ പ്രവേശിപ്പിച്ചത്. തമിഴ്‌നാട് കോണ്‍ഗ്രസ് സംസ്ഥാന അധ്യക്ഷന്‍ കൂടിയാണ് എച്ച് വസന്ത്കുമാര്‍.

രണ്ട് തവണ എംഎല്‍എ ആയിരുന്നു. നംഗുനേരി മണ്ഡലത്തില്‍ നിന്ന് 2006ലും 2016ലും അദ്ദേഹം വിജയിച്ചിരുന്നു. 2019ലെ ലോക്‌സഭാ തെരഞ്ഞെടുപ്പില്‍ മുന്‍ മന്ത്രി പൊന്‍ രാധാകൃഷ്ണനെ തോല്‍പ്പിച്ചാണ് ലോക്‌സഭയിലെത്തിയത്. മുന്‍ കോണ്‍ഗ്രസ് സംസ്ഥാന അധ്യക്ഷന്‍ കുമാരി അനന്തന്‍ ഇദ്ദേഹത്തിന്റെ സഹോദരനരാണ്. ബിജെപി നതോവും തെലങ്കാന ഗവര്‍ണറുമായ തമിഴിസൈ സൗന്ദരരാജന്‍ മരുമകളാണ്.