ബംഗളൂരു: കര്‍ണാടക തെരഞ്ഞടുപ്പ് പ്രചാരണത്തിന്റെ ഭാഗമായി പ്രധാനമന്ത്രി നരേന്ദ്രമോദി ഇന്നെത്തും. ചാമരാജനഗറിലും ഉഡുപ്പിയിലും ബെലഗാവിയിലുമാണ് ഇന്നത്തെ റാലികള്‍. അഞ്ച് ദിവസങ്ങളിലായി പതിനഞ്ച് റാലികളില്‍ മോദി പങ്കെടുക്കും. മോദിയെത്തുന്നതോടെ പ്രചാരണത്തില്‍ മേല്‍കൈ നേടാനാവുമെന്നാണ് ബിജെപിയുടെ പ്രതീക്ഷ. 

ബിജെപിക്ക് മേല്‍ക്കൈ ഇല്ലാത്ത മേഖലകളിലാണ് മോദിയുടെ റാലികള്‍ എന്നതും ശ്രദ്ധേയമാണ്. കര്‍ണാടകയില്‍ ബിജെപി തെരഞ്ഞടുപ്പ് പ്രചാരണരംഗത്ത് റെഡ്ഡിമാര്‍ സജീവസാന്നിധ്യമായ വേളയിലാണ് മോദിയെത്തുന്നത്.ഇവരുടെ തട്ടകമായ ബെല്ലാരിയില്‍ മോദിയുടെ റാലി വ്യാഴാഴ്ചയാണ്. ലിംഗായത്ത്, ജെഡിഎസ് വിഷയത്തില്‍ മോദി നിലപാട് വ്യക്തമാക്കുമെന്നാണ് പാര്‍ട്ടി പ്രവര്‍ത്തകരുടെ പ്രതീക്ഷ.മുമ്പെങ്ങും ഇല്ലാത്തവിധം കാണ്‍ഗ്രസും ജെഡിഎസും ഏറ്റുമുട്ടുമ്പോള്‍ ബിജെപിക്ക് നേട്ടം കൊയ്യാനാകുമെന്നാണ് പ്രതീക്ഷ.ജെഡിഎസുമായുണ്ടാക്കിയ ധാരണയാണ് മേഖലയില്‍ ബിജെപി നേതാക്കളുടെ സജീവസാന്നിധ്യത്തിന് കാരണമെന്ന് കോണ്‍ഗ്രസ് ആരോപിക്കുന്നുണ്ട്. ഇവിടെ ആകെയുളള 57 സീറ്റില്‍ നാലില്‍ മാത്രമാണ് ബിജെപിക്ക് കഴിഞ്ഞ തവണ ജയിക്കാനായത്.