ന്യൂഡല്‍ഹി: ജമ്മു കശ്മീരിലേക്ക് അനുമതിയില്ലാതെ സന്ദര്‍ശനം നടത്തിയ പ്രതിപക്ഷ പാര്‍ട്ടി നേതാക്കളെ വിമര്‍ശിച്ച് ബിഎസ്പി നേതാവ് മായാവതി. കശമീരിലെ സ്ഥിതിഗതികള്‍ സാധാരണ നിലയിലാവാന്‍ കാത്തിരിക്കണമെന്ന് മായാവതി അഭിപ്രായപ്പെട്ടു.

രാജ്യത്ത് സമത്വവും ഐക്യവും അഖണ്ഡതും ഉണ്ടാവുന്നതിനെയാണ് അംബേദ്കര്‍ ആഗ്രഹിച്ചിരുന്നതെന്ന് മായാവതി ട്വീറ്റില്‍ പറഞ്ഞു. കശ്മീരിന് പ്രത്യേക പദവി നല്‍കുന്ന 370ാം വകുപ്പിനെ അംബേദ്കര്‍ അനുകൂലിച്ചിരുന്നില്ല. അതുകൊണ്ടാണ് ബിഎസ്പി കേന്ദ്ര നടപടിയെ പിന്തുണച്ചതെന്ന് മായാവതി പറഞ്ഞു.

ഭരണഘടന നിലവില്‍ വന്ന് 69 വര്‍ഷത്തിനു ശേഷമാണ് 370ാംവകുപ്പ് ഇല്ലാതായിരിക്കുന്നത്. കശ്മീരില്‍ സ്ഥിതിഗതികള്‍ സാധാരണ നിലയിലാവാന്‍ സമയമെടുക്കും. അതിനായി കാത്തിരിക്കുകയാണ് വേണ്ടത്. കോടതിയും ഈ സമീപനമാണ് സ്വീകരിച്ചിട്ടുള്ളത്. കാണ്‍ഗ്രസിന്റെയും മറ്റു പാര്‍ട്ടികളുടെയും നേതാക്കള്‍ അനുമതിയില്ലാതെ കശ്മീരിലേക്കു പോയത് കേന്ദ്ര സര്‍ക്കാരിനും ഗവര്‍ണര്‍ക്കും രാഷ്ട്രീയക്കളിക്കുള്ള അവസരമുണ്ടാക്കിക്കൊടുക്കാനാണോയെന്ന് മായാവതി ചോദിച്ചു.