ഹൈദരാബാദ്: തെലങ്കാനയില്‍ കരകവിഞ്ഞ് ഒഴുകുന്ന പുഴയില്‍ കുടുങ്ങിപ്പോയ നായയെ സുരക്ഷാ ജീവനക്കാരന്‍ അതിസാഹസികമായി രക്ഷിക്കുന്നതിന്റെ വീഡിയോ പുറത്ത്. തെലങ്കാനയില്‍ കനത്ത മഴ തുടരുകയാണ്. കനത്തമഴയില്‍ നദികള്‍ കരകവിഞ്ഞൊഴുകുന്നതിനെ തുടര്‍ന്ന് ജാഗ്രതാ നിര്‍ദേശം നല്‍കിയിരിക്കുകയാണ്.

നായയെ രക്ഷിക്കുന്ന ബുധനാഴ്ചത്തെ ദൃശ്യങ്ങളാണ് വ്യാപകമായി പ്രചരിക്കുന്നത്. നഗര്‍കര്‍ണൂലില്‍ തെലങ്കാന ഹോംഗാര്‍ഡ് മുജീബാണ് അതിസാഹസികമായി നായയെ രക്ഷിക്കുന്നത്. കരകവിഞ്ഞൊഴുകുന്ന നദിയില്‍ നിന്ന് രക്ഷപ്പെടാന്‍ വളളിച്ചെടിയില്‍ പിടിച്ചുകിടക്കുകയാണ് നായ. ഇത് ശ്രദ്ധയില്‍പ്പെട്ട ഹോം ഗാര്‍ഡ് ജെസിബിയുടെ സഹായത്തോടെയാണ് നായയെ രക്ഷിച്ചത്.

ജെസിബിയില്‍ നായയുടെ അടുത്ത് പോയാണ് ഹോം ഗാര്‍ഡ് രക്ഷിച്ചത്. കുത്തിയൊഴുകുന്ന വെളളത്തില്‍ ഒരു കൈ ജെസിബിയില്‍ പിടിച്ചു കൊണ്ടായിരുന്നു രക്ഷാപ്രവര്‍ത്തനം.