നോയിഡ: കുറച്ചുദിവസത്തേക്ക് അവധി നല്‍കാത്തതിനെ തുടര്‍ന്ന് വീട്ടുജോലിക്കാരന്‍  ഏഴുപത് കാരനായ വീട്ടുടമയെ കുത്തിപ്പരിക്കേല്‍പ്പിച്ചു. ഞായറാഴ്ചയാണ് സംഭവം. ഉടമയോട് ഇയാള്‍ കുറച്ചുദിവസത്തേക്ക് അവധി ആവശ്യപ്പെട്ടിരുന്നു. ഇത് നല്‍കാന്‍ വിസമ്മതിച്ചതിനെ തുടര്‍ന്നായിരുന്നു ആക്രമണം.

18കാരനായ ബീഹാര്‍ സ്വദേശി റോഷനാണ് വീട്ടുടമയെ കുത്തിപ്പരിക്കേല്‍പ്പിച്ചത്. 70കാരനായ കമലാ ചന്ദും ഭാര്യയും മാത്രമാണ് വീട്ടിലുണ്ടായിരുന്നത്. രണ്ട് മാസങ്ങള്‍ക്ക് മുന്‍പാണ് ഇയാളെ വീട്ടുജോലിക്കായി നിര്‍ത്തിയത്. സാരമായി പരിക്കേറ്റ കമലാചന്ദ് ആശുപത്രിയില്‍ ചികിത്സയിലാണ്. ഇവരില്‍ നിന്നും പൊലീസ് മൊഴി രേഖപ്പെടുത്തി.

വീട്ടുജോലിക്കാരന്‍  അവധി ആവശ്യപ്പെട്ടിരുന്നു. എന്നാല്‍ ഇത് നല്‍കാന്‍ കഴിയില്ലെന്നറിയിച്ചതിനെ തുടര്‍ന്ന് റോഷന്‍ വീട്ടുടമയെ മര്‍ദ്ദിക്കുകയായിരുന്നെന്ന് പൊലീസ് പറഞ്ഞു. സംഭവത്തിന് പിന്നാലെ കത്തിയും കൊണ്ട് റോഷന്‍ സംഭവസ്ഥലത്തുനിന്ന് രക്ഷപ്പെട്ടു. പ്രതിക്കെതിരെ കൊലപാതകശ്രമം ഉള്‍പ്പടെയുള്ള വകുപ്പുകള്‍ പ്രകാരം പൊലീസ് കേസെടുത്തു.