രണ്ട് ഘട്ടങ്ങളിലായി പ്രഖ്യാപിച്ച ഗുജറാത്ത് തെരഞ്ഞെടുപ്പ് അവസാനിച്ചതിന് പിന്നാലെ വോട്ടിങ് മെഷിനില്‍ കൃത്രിമം നടന്നതായുള്ള ആരോപണം ഉയരുന്നു. ആരവല്ലിയില്‍ വോട്ട് ചെയ്യാനെത്തിയവര്‍ കോണ്‍ഗ്രസിന് വോട്ട് രേഖപ്പെടുത്തേണ്ട ബട്ടനില്‍ അമര്‍ത്തിയിട്ടും വോട്ട് രേഖപ്പെടുത്താന്‍ സാധിക്കുന്നുണ്ടായിരുന്നില്ല എന്നാണ് ആരോപണം ഉയര്‍ന്നിരിക്കുന്നത്. 

ഇതിനെ തുടര്‍ന്ന് ആരവല്ലിയിലെ ബയാദിലെ സിംലാജ് ഗ്രാമത്തില്‍ വോട്ടിങ് തടസപ്പെട്ടു. അഹമ്മദാബാദിലും, മെഹ്‌സാനിലും, പാടാനിലും സമാനമായ ഇല്‌ക്ട്രോണിക് വോട്ടിങ് മെഷിന്‍ കൃത്രിമം റിപ്പോര്‍ട്ട് ചെയ്യപ്പെട്ടതിന് പിന്നാലെയാണ് ആരവല്ലിയിലെ സംഭവവും ഉയര്‍ന്നു വരുന്നത്. 

ജാഗ്രതയോടെ വോട്ട് രേഖപ്പെടുത്തണമെന്ന ബിജെപി എംപി ശത്രുഖ്‌നന്‍ സിന്‍ഹയുടെ മുന്നറിയിപ്പിന് പിന്നാലെയാണ് വോട്ടിങ്  മെഷിന്‍ കൃത്രിമം നടന്നതായുള്ള റിപ്പോര്‍ട്ടുകള്‍ വരുന്നത്. വിചിത്രമായി പെരുമാറാന്‍ സാധ്യതയുള്ള ഇലക്ട്രോണക് വോട്ടിങ് മെഷിനുകളില്‍ ശ്രദ്ധിക്കുക എന്ന മുന്നറിയിപ്പായിരുന്നു ശത്രുഖ്‌നന്‍ സിന്‍ഹ ട്വിറ്ററിലൂടെ  നല്‍കിയത്.