ചെന്നൈ: തമിഴ്‌നാട്ടില്‍ ഔഷധ നിര്‍മ്മാണ കമ്പനിയിലെ മാനേജര്‍ മരിച്ചു. കൊറോണ വൈറസ് ബാധയ്‌ക്കെതിരെ ഇദ്ദേഹവും കമ്പനിയുടെ ഉടമയും ചേര്‍ന്ന് മരുന്ന് വികസിപ്പിച്ചെടുത്തതായി അവകാശവാദം ഉന്നയിച്ചിരുന്നു. പരീക്ഷണം എന്ന നിലയില്‍ മരുന്ന് കഴിച്ച മാനേജറും കമ്പനിയുടെ ഉടമയും കുഴഞ്ഞുവീഴുകയായിരുന്നു. ഉടനെ ആശുപത്രിയില്‍ എത്തിച്ചെങ്കിലും 47 വയസുകാരനായ മാനേജറുടെ ജീവന്‍ രക്ഷിക്കാനായില്ല.

ഫാര്‍മസിസ്റ്റും പ്രൊഡക്ഷന്‍ മാനേജറുമായ കെ ശിവനേശനാണ് മരിച്ചത്. ചെന്നൈയ്ക്ക് സമീപമുളള പെരുങ്കുടിയാണ് സ്വദേശം. പരീക്ഷണത്തിന്റെ ഭാഗമായി മരുന്നിന്റെ നല്ലൊരു ഭാഗവും കഴിച്ച ശിവനേശന്‍ ചെന്നൈയിലെ പ്രമുഖ ആശുപത്രിയിലാണ് മരിച്ചത്. അല്‍പ്പം മരുന്നു തുളളികള്‍ മാത്രം കഴിച്ച 67 വയസുകാരനായ കമ്പനി ഉടമ രാജ്കുമാറിന്റെ നില തൃപ്തികരമാണ്. ഇദ്ദേഹം ചികിത്സയിലാണെന്ന് പൊലീസ് പറയുന്നു. അന്വേഷണം ആരംഭിച്ചു.

നിലവില്‍ കൊറോണ വൈറസ് ബാധയ്ക്ക് എതിരെ മരുന്ന് കണ്ടെത്തിയിട്ടില്ല. ഇന്ത്യയിലും വിവിധ ലോകരാജ്യങ്ങളിലുമായി പരീക്ഷണം നടന്നുവരികയാണ്.