മുംബൈ: ക്ലാസ്സിനിടയില്‍ അപ്രതീക്ഷിതമായി കയറിവന്ന അതിഥിയെക്കണ്ട് ബോംബെ ഐഐടിയിലെ വിദ്യാര്‍ത്ഥികള്‍ അക്ഷരാര്‍ത്ഥത്തില്‍ അമ്പരന്നു. ചിലര്‍ മുഖമടച്ചു ചിരിച്ചപ്പോള്‍ മറ്റുചിലര്‍ ഇരുപ്പിടങ്ങളില്‍ നിന്ന് എഴുന്നേറ്റുമാറി. ഒരു പശുവാണ് ക്ലാസ് നടക്കുന്നതിനിടയില്‍ വിദ്യാര്‍ത്ഥികള്‍ക്കിടയിലേക്ക് പ്രവേശിച്ചത്. 

വളരെ പരിചിതമായ സ്ഥലത്തുകൂടെ നടന്നുനീങ്ങുന്നതു പോലായിരുന്നു പശുവിന്റെ ഭാവം. സംഭവത്തിന്റെ വിഡിയോ ദ‌ൃശ്യങ്ങൾ സമൂഹമാധ്യമങ്ങളിലൂടെ വൈറലായിട്ടുണ്ട്.

എന്നാൽ വിഡിയോയിൽ കാണുന്നത് ഏത് കാമ്പസാണെന്നത് വ്യക്തമല്ലെന്നും തിയ്യതി രേഖപ്പെടുത്തിയിട്ടില്ലാത്തതിനാൽ വിഡിയോ മുൻപ് ചിത്രീകരിച്ചതും ആവാമെന്നുമാണ് ഐഐടി അധികൃതരുടെ പ്രതികരണം. അത‌േസമയം വിഡിയോ ബോംബെ ഐഐടിയിലേതാണെന്ന് ഉറപ്പിച്ച് ചില വിദ്യാർത്ഥികൾ രം​ഗത്തെത്തിയിട്ടുണ്ട്. 

പുതിയ ഇന്ത്യ കെട്ടിപ്പടുക്കുന്നതിനെ കുറിച്ചുള്ള ഓര്‍മ്മപ്പെടുത്തലാണെന്നാണ് വിഡിയോയ്ക്ക് താഴെ നിറയുന്ന കമന്റുകൾ. ഇത് പുതിയ ഇന്ത്യയുടെ മുഖമാണെന്ന് കുറിച്ചാണ് മറ്റുചിലർ വിഡിയോ പങ്കുവച്ചിരിക്കുന്നത്.