ഗാന്ധിനഗര്‍: ഗുജറാത്ത് രാജ്യസഭാ തെരഞ്ഞെടുപ്പിലേറ്റ തെരഞ്ഞെടുപ്പിലേറ്റ തിരിച്ചടിക്ക് പിന്നാലെ മിഷന്‍ 150 എന്ന പദ്ധതിയുമായി ബിജെപി ദേശീയ അധ്യക്ഷന്‍ അമിത് ഷാ. ബിജെപിയില്ലാതെ മറ്റൊരു പാര്‍ട്ടിയും ഗുജറാത്തില്‍ നിന്നാരും രാജ്യസഭയില്‍ എത്തേണ്ടെന്നാണ് അമിത്ഷായുടെ നിര്‍ദേശം. ഇതിനായി അടുത്ത തെരഞ്ഞെടുപ്പില്‍ ആകെയുള്ള 182 സീറ്റില്‍ 150 സീറ്റില്‍ വിജയിക്കണമെന്നാണു സംസ്ഥാന ഘടകത്തോട് ആവശ്യപ്പെട്ടിരിക്കുന്നത്.

ഗുജറാത്തിലെ പാര്‍ട്ടി ആസ്ഥാനത്ത് എംപിമാരായി തെരഞ്ഞെടുക്കപ്പെട്ടതിന് ശേഷം സംഘടിപ്പിച്ച അനുമോദനയോഗത്തില്‍ സംസാരിക്കുകയായിരുന്നു അമിത് ഷാ. മിഷന്‍ 150 ലക്ഷ്യമിട്ടുവേണം പ്രവര്‍ത്തിക്കാനെന്ന് അമിത് ഷാ നേതാക്കള്‍ക്കും പ്രവര്‍ത്തകര്‍ക്കും നിര്‍ദേശം നല്‍കി. അങ്ങനെയെങ്കില്‍ ഗുജറാത്തിലെ രാജ്യസഭാ സീറ്റുകളിലെല്ലാം വിജയിക്കാനാകുമെന്നും അമിത് ഷാ പറഞ്ഞു. 150 നിയമസഭാ സീറ്റുകള്‍ നേടുകയാണെങ്കില്‍ നമ്മുടെ സ്ഥാനാര്‍ത്ഥികളെല്ലാം തെരഞ്ഞെടുപ്പില്‍ വിജയിക്കും. ഡിസംബറില്‍ നടക്കുന്ന നിയമസഭാ തെരഞ്ഞെടുപ്പില്‍ നമ്മളത് നേടുമെന്നും അമിത് ഷാ പറഞ്ഞു.