പനാജി: ​സംസ്ഥാനത്തെത്തുന്ന വിനോദസഞ്ചാരികൾക്കെതിരെ മറ്റൊരു ​ഗോവൻ മന്ത്രി കൂടി രം​ഗത്ത്. ഗോവൻ സംസ്​കാരത്തെ മാനിക്കാത്ത ടൂറിസ്​റ്റുകളെ നാടുകടത്തുമെന്ന്​ സംസ്ഥാന ടൂറിസം മന്ത്രി മനോഹർ അജഗോങ്കർ പറഞ്ഞു. പനാജിയിൽ ഗോവ ഫുഡ് ആന്റ് കൾച്ചറൽ ഫെസ്റ്റിവൽ ഉദ്ഘാടനം ചെയ്യവെയാണ് മന്ത്രിയുടെ വിവാദ പ്രസ്താവന. 

​ഗോവയുടെ സംസ്കാരവും പൈതൃകവും അം​ഗീകരിക്കാത്തവരെ സംസ്ഥാനത്തേക്ക് സ്വാ​ഗതം ചെയ്യാനാവില്ല. ഇത്തരക്കാരെ പിന്തുടർന്ന് നാടുകടത്തും. തന്റെ വാക്കുകൾ വ്യക്തമാണ്. ഇക്കാര്യത്തിൽ മറ്റാരുടേയും നിർദേശങ്ങൾ ചെവിക്കൊള്ളില്ല. ​ഗോവൻ സംസ്കാരവും പാരമ്പര്യവും സംരക്ഷിക്കാൻ പ്രതിജ്ഞാബദ്ധരാണ്. മയക്കുമരുന്ന് വ്യാപാരത്തിനായി ആരും ​ഗോവയിലേക്ക് വരേണ്ടെന്നും മന്ത്രി അജ​ഗോങ്കർ പറഞ്ഞു. 

ഗോവയിലെത്തുന്ന ഇന്ത്യൻ ടൂറിസ്​റ്റുകൾ നികൃഷ്​ട ജീവികളാണെന്നായിരുന്നു കഴിഞ്ഞദിവസം ​ഗോവൻ കൃഷിമന്ത്രി വിജയ്​ സർദേശായിയുടെ പ്രസ്​താവന. ഉ​ത്തരേന്ത്യയിൽ നിന്നുള്ള ടൂറിസ്​റ്റുകൾ ഗോവയെ മറ്റൊരു ഹരിയാനയാക്കാനാണ്​ ശ്രമിക്കുന്നതെന്നും അദ്ദേഹം ആരോപിച്ചിരുന്നു. പ്രസ്താവന വിവാദമായതോടെ വിശദീകരണവുമായി വിജയ് സർദേശായി രം​ഗത്തെത്തി. തന്റെ പ്രസം​ഗം സാഹചര്യത്തിൽ നിന്നും അടർത്തിമാറ്റി വിവാദം ഉണ്ടാക്കുകയായിരുന്നെന്നാണ് സർദേശായിയുടെ വിശദീകരണം.