ന്യൂഡല്ഹി: സുപ്രീംകോടതി ചീഫ് ജസ്റ്റിസ് രഞ്ജന് ഗൊഗോയ്ക്ക് എതിരായ ലൈംഗികാരോപണ പരാതിയില് വന് ഗൂഢാലോചന നടന്നുവെന്ന അഭിഭാഷകന്റെ വെളിപ്പെടുത്തല് അന്വേഷിക്കുമെന്ന് സുപ്രീംകോടതി. ചീഫ് ജസ്റ്റിസിന് എതിരായ ആരോപണത്തിന് പിന്നിലെ ഗൂഢാലോചനയുടെ വേരുകള് വരെ ചികഞ്ഞ് അന്വേഷണം നടത്തണമെന്ന് ജസ്റ്റിസ് അരുണ് മിശ്ര പറഞ്ഞു. ചീഫ് ജസ്റ്റിസിനെ കുടുക്കാന് വന്തുക വാഗ്ദാനം ചെയ്തുവെന്ന അഭിഭാഷകന് ഉത്സവ് ബിന്സിന്റെ വെളിപ്പെടുത്തലില് പുതിയ സത്യവാങ്മൂലം സമര്പ്പിക്കാന് ആവശ്യപ്പെട്ട സുപ്രീംകോടതി, കേസ് നാളത്തേക്ക് മാറ്റി. നാളെ 10.30ന് സത്യവാങ്മൂലം സമര്പ്പിക്കാനാണ് കോടതി നിര്ദേശിച്ചിരിക്കുന്നത്.
അഭിഭാഷകന്റെ വെളിപ്പെടുത്തലുകള് അന്വേഷിച്ചില്ലെങ്കില് കോടതിയുടെ വിശ്വാസ്യത നഷ്ടപ്പെടുമെന്ന് ജസ്റ്റിസ് അരുണ് മിശ്ര പറഞ്ഞു. ചീഫ് ജസ്റ്റിസിന് എതിരായ പരാതിയിലെ ഗൂഢാലോചനയാണ് അന്വേഷിക്കുന്നതെന്നും അദ്ദേഹം വ്യക്തമാക്കി.
ജുഡീഷ്യറിയെ നിയന്ത്രിക്കാന് ഒരു സംഘം പ്രവര്ത്തിക്കുന്നെങ്കില് അത് അനുവദിക്കില്ലെന്നും ജസ്റ്റിസ് അരുണ് മിശ്ര പറഞ്ഞു. ചിഫ് ജസ്റ്റിസ് ഞ്ജന് ഗൊഗോയ്ക്ക് എതിരായ ലൈംഗിക ആരോപണ കേസിന് പിന്നില് ഒരു കോര്പ്പറേറ്റ് സ്ഥാപനമാണ് എന്നായിരുന്നു അഭിഭാഷകന്റെ വെളിപ്പെടുത്തല്. ആരോപണവുമായി ബന്ധപ്പെട്ട് സിബിഐ ഡയറക്ടര്, ഇന്റലിജന്സ് ബ്യൂറോ ഡയറക്ടര്, ഡല്ഹി പൊലീസ് കമ്മിഷണര് എന്നിവരെ സുപ്രിം കോടതി വിളിച്ചുവരുത്തി.
അഭിഭാഷകന് മുദ്രവച്ച കവറില് സമര്പ്പിച്ച റിപ്പോര്ട്ട് പരിശോധിച്ചതിനു ശേഷമാണ് പൊലീസ് മേധാവികളോടു ഹാജരാവാന് ബെഞ്ച് നിര്ദേശം നല്കിയത്. ഗൗരവമേറിയ കാര്യങ്ങളാണ് റിപ്പോര്ട്ടിലുള്ളതെന്ന് ബെഞ്ച് അഭിപ്രായപ്പെട്ടു. വസ്തുതകളാണ് കോടതിക്കു മുന്നില് സമര്പ്പിക്കുന്നതെന്നും റിപ്പോര്ട്ടില് ഉള്ള സിസിടിവി ദൃശ്യങ്ങളില്നിന്നു കൂടുതല് വ്യക്തത ലഭിക്കുമെന്നും ബെയിന്സ് പറഞ്ഞു.
റിപ്പോര്ട്ട് പരിശോധിച്ച ബെഞ്ച്, ഉത്തരവാദപ്പെട്ട ഏതെങ്കിലും സിബിഐ ഉദ്യോഗസ്ഥനെ ഹാജരാക്കാനാവുമോയെന്ന് അറ്റോര്ണി ജനറല് കെകെ വേണുഗോപാലിനോട് ആരാഞ്ഞു. ഗുരുതരമായ ആക്ഷേപങ്ങളാണ് ബെയിന്സ് മുന്നോട്ടുവച്ചിട്ടുള്ളതെന്നും അന്വേഷണത്തിന് പ്രത്യേക സംഘത്തെ നിയോഗിക്കണമെന്നും സോളിസിറ്റര് ജനറല് തുഷാര് മേത്ത ആവശ്യപ്പെട്ടു.
ബെയിന്സിനു സുരക്ഷ ഉറപ്പുവരുത്താന് സോളിസിറ്റര് ജനറലിന് കോടതി നിര്ദേശം നല്കി. ചിലര്ക്കെതിരെ നടപടിയെടുക്കാന് ഒരു ചീഫ് ജസ്റ്റിസും ധൈര്യപ്പെട്ടിട്ടില്ലെന്നും രഞ്ജന് ഗൊഗോയ് അതിനു തയാറായെന്നും ജസ്റ്റിസ് അരുണ് മിശ്ര നിരീക്ഷിച്ചു.
വാദത്തിനിടെ മുതിര്ന്ന അഭിഭാഷക ഇന്ദിര ജയ്സിങ് ഇടപെടാന് ശ്രമിച്ചെങ്കിലും കോടതി അനുവദിച്ചില്ല. ലൈംഗിക ആരോപണ കേസ് കൈകാര്യം ചെയ്യുന്നതിലെ നടപടിക്രമങ്ങള് അസ്വസ്ഥപ്പെടുത്തുന്നതാണെന്ന് ഇന്ദിര ജയ്സിങ് പറഞ്ഞു. എന്നാല് കൂടുതല് ഗുരതരമായ കാര്യങ്ങളാണ് ബെയിന്സിന്റെ സത്യവാങ്മൂലത്തില് ഉള്ളതെന്നു ചൂണ്ടിക്കാട്ടിയ കോടതി അത് അറിയാത്തതിനാലാണ് ഇന്ദിര ജയ്സിങ് ഇത്തരത്തില് പ്രതികരിക്കുന്നതെന്ന് പ്രതികരിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates