ന്യൂഡെല്‍ഹി: കഴിഞ്ഞ മാസം ഹരിയാനയില്‍ ട്രയിനില്‍ മര്‍ദ്ദനത്തിനിരയായി 17 കാരന്‍ മരിച്ച കേസില്‍ മുഖ്യപ്രതി മഹാരാഷ്ട്രയില്‍ അറസ്റ്റിലായി. പ്രതി കുറ്റം സമ്മതിച്ചിട്ടുണ്ടെന്ന് വ്യക്തമാക്കിയ ഫരീദാബാദ് പോലീസ് നിയമ പ്രശ്‌നങ്ങളുള്ളതിനാല്‍ ഇയാളുടെ പേരുവിവരങ്ങള്‍ വെളിപ്പെടുത്താനാകില്ലെന്നും വ്യക്തമാക്കി. 

മഹാരാഷ്ട്രയിലെ ധൂലെ ജില്ലയില്‍ വെച്ചാണ് മുഖ്യപ്രതിയെ അറസ്റ്റു ചെയ്തത്. ഇയാളെ നാളെ കോടതിയില്‍ ഹാജരാക്കും. ഈ മാസം 22നു ഡെല്‍ഹിയിയില്‍ നിന്നും ഈദ് ആഘോഷത്തിനായി സാധനങ്ങള്‍ വാങ്ങി മടങ്ങുമ്പോഴാണ് ജുനൈദും സഹോദരങ്ങളായ സക്കീര്‍, മുഹ്‌സിന്‍, ഹസീബ് എന്നിവരെ ഒരു സംഘം ആക്രമിക്കുകയായിരുന്നു. മുസ്ലിം വിരുദ്ധരാണ് ആക്രമണം നടത്തിയതെന്ന റിപ്പോര്‍ട്ടുകളുണ്ടായിരുന്നു. ജുനൈദിനെ ആക്രമിക്കുന്ന സമയത്തു മാട്ടിറച്ചി തിന്നുന്നവന്‍, ചേലാകര്‍മം ചെയ്തവന്‍ എന്നൊക്കെ പറഞ്ഞുകൊണ്ടായിരുന്നു ആക്രമിച്ചിരുന്നതെന്നാണ് ബന്ധുക്കള്‍ വ്യക്തമാക്കിയിരുന്നത്.