ലക്‌നൗ:ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിനെ കാണണാനെത്തിയ ദളിതര്‍ക്ക് സോപ്പും പെര്‍ഫ്യൂമും നല്‍കിയ നടപടിയില്‍ പ്രതിഷേധിച്ച് ദളിത് സംഘടന ആദിത്യനാഥിന് 16അടി നീളമുള്ള സോപ്പ് അയച്ചുകൊടുക്കുന്നു. ഗുജറാത്തില്‍ രൂപംകൊണ്ട ഡോ.അംബേദ്കര്‍ വെചന്‍ പ്രതിഭാസ് സമിതിയാണ്  ആദിത്യനാഥിന് സോപ്പയച്ചുകൊടുത്ത് പ്രതിഷേധമറിയിക്കുന്നത്. താങ്കള്‍ ആദ്യം കുളിച്ചു വൃത്തിയാകൂ എന്ന ഉപദേശവും നല്‍കും.ജൂണ്‍ 9ന് ആദിത്യനാഥിന് സോപ്പ് അയക്കും. അയക്കുന്നതിന് മുന്‍പ് പൊതു പരിപാടിയില്‍ സോപ്പ് പ്രദര്‍ശിപ്പിച്ചതിനു ശേഷമായിരിക്കും അയക്കുക. സംഘടനയുടെ ഭാരവാഹികള്‍ പറഞ്ഞു. 

മുഷാര്‍ ജനവിഭാഗം തിങ്ങിപാര്‍ക്കുന്ന പ്രദേശമായ മുഷാര്‍ ബസ്തിയില്‍ നിന്ന് ആദിത്യനാഥിനെ കാണാന്‍ എത്തിയവരോടായിരുന്നു സോപ്പുപയോഗിച്ച് കുളിച്ചിട്ട് വരാന്‍ ഉത്തരവിട്ടത്. ഇതിനെതിരെ വ്യാപകമായ പ്രതിഷേധങ്ങള്‍ നടന്നിരുന്നു. അതിന് പിന്നാലെയാണ് ദളിത് സംഘടന ആദിത്യനാഥിന് സോപ്പ് അയച്ച് കൊടുക്കാനൊരുങ്ങന്നത്.

ആദിത്യനാഥ് മനുവാദി രാഷ്ട്രീയത്തെയാണ് പ്രതിനിധാനം ചെയ്യുന്നത്. അദ്ദേഹമാണ് സോപ്പിട്ടുകുളിച്ച് ശരികേടുകള്‍ കളയേണ്ടത്. സംഘടനയുടെ ഭാരവാഹികളായ കിരിത് റാഹ്‌തോഡ്, കാന്തിലാല്‍  പാര്‍മര്‍ എന്നിവര്‍ മാധ്യമങ്ങളോട് പറഞ്ഞു.