ലക്‌നോ: താജ്മഹല്‍ ഇന്ത്യന്‍ തൊഴിലാളികളുടെ രക്തവും വിയര്‍പ്പും കൊണ്ട് നിര്‍മിച്ചതാണെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. ആരാണ് താജ്മഹല്‍ നിര്‍മിച്ചത്, എന്തിനു വേണ്ടി താജ്മഹല്‍ നിര്‍മിച്ചു എന്നത് വിഷയമല്ലെന്നും അദ്ദേഹം പറഞ്ഞു. താജ്മഹല്‍ അടിമത്തത്തിന്റെ പ്രതീകമാണെന്ന ബിജെപി എംഎല്‍എയുടെ പ്രസ്താവന വിവാദമാവുന്നതിനിടയിലാണ് യോഗി പുതിയ വാദം മുന്നോട്ടുവച്ചത്. ഈ മാസം 25ന് യോഗി ആഗ്ര സന്ദര്‍ശിക്കും.

താജ്മഹലിന് ടൂറിസം പ്രാധാന്യമുണ്ടെന്നും അവിടെയെത്തുന്ന യാത്രികര്‍ക്ക് സര്‍ക്കാര്‍ സുരക്ഷ ഉറപ്പാക്കുമെന്നും യോഗി പറഞ്ഞു.

അടുത്തിടെ ഉത്തര്‍പ്രദേശ് സര്‍ക്കാര്‍ പുറത്തിറക്കിയ ടൂറിസം കേന്ദ്രങ്ങളുടെ ബുക്ക്‌ലെറ്റില്‍ നിന്നും താജ്മഹലിനെ ഒഴിവാക്കിയത് വിവാദമായിരുന്നു. ഇതിനുപിന്നാലെയാണ് താജ്മഹല്‍ നിര്‍മിച്ച മുഗള്‍ ചക്രവര്‍ത്തി ഷാജഹാനെ അപഹസിച്ച് ബിജെപി എംഎല്‍എ സംഗീത് സോം രംഗത്ത് എത്തിയത്.