ന്യൂഡല്‍ഹി: ത്രിപുര ബിജെപി ഘടകത്തില്‍ കലാപം രൂക്ഷം. മുഖ്യമന്ത്രി ബിപ്ലവ് കുമാര്‍ ദേബിനെ മാറ്റണമെന്ന് ആവശ്യപ്പെട്ട് ഒരുവിഭാഗം എംഎല്‍എമാര്‍ കേന്ദ്രനേതൃത്വത്തെ സമീപിച്ചു. 

എംഎല്‍എ സുദീര്‍ റോയ് ബര്‍മന്റെ നേതൃത്വത്തിലുള്ള ഏഴംഗ സംഘമാണ് ഡല്‍ഹിയിലെത്തിയിരിക്കുന്നത്. മറ്റ് രണ്ട് എംഎല്‍എമാര്‍ കൂടി തങ്ങളോടൊപ്പമുണ്ടെന്ന് ഇവര്‍ അവകാശപ്പെട്ടു. 

മന്ത്രിസഭയിലെ മറ്റംഗങ്ങളോടും പാര്‍ട്ടി എംഎല്‍എമാരോടും പൂര്‍ണമായും മുഖം തിരിക്കുകയാണ് മുഖ്യമന്ത്രിയെന്നാണ് ഇവരുടെ പരാതി. പ്രധാനമന്ത്രി നരേന്ദ്ര മോദിയോടും ബിജെപി ദേശീയനേതൃത്വത്തോടും പൂര്‍ണമായി കൂറ് പ്രഖ്യാപിക്കുന്ന വിമത എംഎല്‍എമാര്‍, തങ്ങള്‍ക്ക് പരാതി ബിപ്ലബ് കുമാറിനോട് മാത്രമാണെന്നും വ്യക്തമാക്കിയിട്ടുണ്ട്. 

ത്രിപുരയില്‍ ബിപ്ലബ് നടത്തുന്നത് ഏകാധിപത്യ ഭരണമാണ് എന്നാണ് ഇവര്‍ ആരോപിക്കുന്നത്. ബിപ്ലബിനെ സ്ഥാനത്ത് നിന്ന് മാറ്റിയില്ലെങ്കില്‍ ഇനി വരുന്ന തെരഞ്ഞെടുപ്പില്‍ കനത്ത തോല്‍വി ഏറ്റുവാങ്ങേണ്ടിവരുമെന്നും നേതാക്കള്‍ മുന്നറിയിപ്പ് നല്‍കുന്നു. അതേസമയം, സര്‍ക്കാരിന്റെ നില സുരക്ഷിതമാണെന്ന് മുഖ്യമന്ത്രിക്കൊപ്പമുള്ള നേതാക്കള്‍ അവകാശപ്പെട്ടു.