കൊല്‍ക്കത്ത: ബംഗാളില്‍ സിപിഎമ്മും ബിജെപിയും കോണ്‍ഗ്രസും തൃണമൂല്‍ കോണ്‍ഗ്രസിനെതിരെ ഒരേ മുന്നണിയില്‍. നന്ദിഗ്രാമിലെ ജില്ലാ പരിഷത്ത് തെരഞ്ഞെടുപ്പിലാണ് ബദ്ധ ശത്രുക്കളായ സിപിഎമ്മും ബിജെപിയും ഒരേ പക്ഷത്ത് അണിനിരക്കുന്നത്.

നന്ദിഗ്രാമിലെ മൂന്നു ജില്ലാ പരിഷത്ത് സീറ്റുകളിലേക്കാണ് തെരഞ്ഞെടുപ്പു നടക്കുന്നത്. തൃണമൂല്‍ കോണ്‍ഗ്രസിനെതിരെ എസ്‌യുസിഐ സ്ഥാനാര്‍ഥികളാണ് ഇവിടെ മത്സരിക്കുന്നത്. എസ്‌യുസിഐയെ പിന്തുണച്ച് ഒന്നിച്ചിരിക്കുകയാണ് സിപിഎം ഉള്‍പ്പെടെയുള്ള ഇടതു പാര്‍ട്ടികളും കോണ്‍ഗ്രസും ബിജെപിയും.

ആസന്നമായ മഹേഷ്തല ഉപതെരഞ്ഞെടുപ്പില്‍ ഉള്‍പ്പെടെ സിപിഎമ്മും കോണ്‍ഗ്രസും ധാരണയുണ്ടാക്കിയിട്ടുണ്ടെങ്കിലും ബിജെപി ഉള്‍പ്പെടുന്ന പക്ഷത്ത് ഇടതു പാര്‍ട്ടികള്‍ നില്‍ക്കുന്നത് ഇത് ആദ്യമാണ്. തദ്ദേശ തെരഞ്ഞെടുപ്പില്‍ പലയിടത്തും പ്രതിപക്ഷപാര്‍ട്ടികള്‍ക്കു മത്സര രംഗത്തു വരാന്‍ പോലും പറ്റാത്ത സാഹചര്യമാണുള്ളത്. നന്ദിഗ്രാമിലാണ് പ്രതിപക്ഷത്തിന് മത്സരിക്കാവുന്ന സാഹചര്യമുള്ള ഒരിടം. അതുകൊണ്ട് ഇവിടെ മത്സരം ശക്തമാക്കുക എന്ന ഉദ്ദേശ്യത്തിലാണ് പ്രതിപക്ഷ പാര്‍ട്ടികള്‍ യോജിച്ചിരിക്കുന്നത് എന്നാണ് നേതാക്കള്‍ പറയുന്നത്.