ഘോരഖ്പൂര്‍: എംഎല്‍എയുടെ താക്കിതിന് മുന്നില്‍ പൊട്ടിക്കരഞ്ഞ് വനിതാ ഐപിഎസ് ഉദ്യോഗസ്ഥ. പരിധി വിടരുതെന്ന ഘോരഖ്പൂര്‍ എംഎല്‍എയുടെ ശാസനയ്ക്ക് മുന്നിലാണ് മുതിര്‍ന്ന വനിതാ പൊലീസ് ഉദ്യോഗസ്ഥ കരഞ്ഞത്.

യുപി മുഖ്യമന്ത്രി യോഗി ആദിത്യനാഥിന്റെ മണ്ഡലത്തില്‍ ഞായറാഴ്ചയായിരുന്നു സംഭവം. ഈ മേഖലയിലെ നിയമവിരുദ്ധ മദ്യവില്‍പ്പന തടയാന്‍ സര്‍ക്കാരും പൊലീസും ഒന്നും ചെയ്യുന്നില്ലെന്ന് ആരോപിച്ച് സ്ത്രീകള്‍ വഴി തടഞ്ഞതോടെയാണ് സംഭവങ്ങള്‍ ആരംഭിക്കുന്നത്. 

വഴി തടഞ്ഞ സ്ത്രീകള്‍ പൊലീസിന് നേരെ കല്ലെറിഞ്ഞ് ആരോപിച്ച് പൊലീസ് നടത്തിയ ലാത്തിച്ചാര്‍ജില്‍ നിരവധി സ്ത്രീകള്‍ക്ക് പരിക്കേറ്റു. ഈ സമയം സംഭവ സ്ഥലത്തെത്തിയ ബിജെപി എംഎല്‍എ രാധാ മോഹന്‍ദാസ് അഗര്‍വാള്‍ ഐപിഎസ് ഉദ്യോഗസ്ഥയായ ചാരു നിഗത്തോട് ദേഷ്യപ്പെടുകയും പരിധി വിടരുതെന്ന് താക്കീത് നല്‍കുകയുമായിരുന്നു. 

എന്നാല്‍ തനിക്കാണ് ഇവിടുത്തെ പൊലീസിന്റെ ചുമതലയെന്നും, എന്താണ് ചെയ്യുന്നതെന്ന് തനിക്ക് ബോധ്യമുണ്ടെന്നും ഐപിഎസ് ഉദ്യോഗസ്ഥ തിരിച്ചടിച്ചു. പക്ഷെ പിന്നീട് തൂവാല കൊണ്ട് ഇവര്‍ കണ്ണുനീര് തുടയ്ക്കുന്ന ദൃശ്യങ്ങളാണ് പുറത്തുവന്നത്.