കന്യാകുമാരി: തീവ്രവാദത്തിന് എതിരെയുള്ള സൈനിക നടപടിയെ പ്രതിപക്ഷം രാഷ്ട്രീയവത്കരിക്കുകയാണെന്ന് പ്രധാനമന്ത്രി നരേന്ദ്ര  മോദി. കന്യാകുമാരിയില്‍ ബിജെപി തെരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.   മോദി വിരുദ്ധര്‍ നയിക്കുന്ന ചില പാര്‍ട്ടികള്‍ ഇന്ത്യയെ പഴിചാരന്‍ ആരംഭിച്ചിട്ടുണ്ട്. രാജ്യം മുഴുവന്‍ സൈന്യത്തെ പിന്തുണയ്ക്കുമ്പോള്‍ അവര്‍ തള്ളിക്കളയുന്നതില്‍ അത്ഭുതമില്ല. ഭീകരവാദത്തിന് എതിരെയുള്ള ഇന്ത്യയുടെ പോരാട്ടത്തെ ലോകരാജ്യങ്ങള്‍ പിന്തുണയ്ക്കുന്നു. പക്ഷേ ഇന്ത്യയിലെ ചില പാര്‍ട്ടികള്‍ നമ്മുടെ പോരാട്ടത്തെ കുറ്റപ്പെടുത്തുകയാണ്- അദ്ദേഹം പറഞ്ഞു. 

ഈ പാര്‍ട്ടികളുടെ പ്രസ്താവനകള്‍ പാകിസ്ഥാനെ പിന്തുണയ്ക്കുന്നതും ഇന്ത്യയെ തളര്‍ത്തുന്നതുമാണെന്നും പ്രധാനമന്ത്രി പറഞ്ഞു. ഈ പാര്‍ട്ടികളുടെ സംശയങ്ങള്‍ പാകിസ്ഥാന്‍ പാര്‍ലമെന്റും പാകിസ്ഥാന്‍ റേഡിയോയും ഇന്ത്യക്കെതിര പ്രയോഗിച്ചുവെന്നും മോദി കുറ്റപ്പെടുത്തി. നിങ്ങള്‍ പാകിസ്ഥാനെയാണോ നമ്മുടെ സേനയെയാണോ പിന്തുണയ്ക്കുന്നത്- മോദി ചോദിച്ചു. 

പ്രതിക്ഷം തീവ്രവാദാത്തെയാണോ സൈനികരെയാണോ സഹായിക്കുന്നത് എന്ന് വ്യക്തമാക്കണം. മോദി വരും പോകും, ഇന്ത്യ നിലനില്‍ക്കും, നിങ്ങളുടെ ശക്തി കൂട്ടനായി ഇന്ത്യയെ ബലഹീനമാക്കുന്നത് അവസാനിപ്പിക്കണം- മോദി പറഞ്ഞു. 

വിങ് കമാന്‍ഡര്‍ അഭിനന്ദന്‍ വര്‍ത്തമാന്‍ തമിഴ്‌നാട്ടുകാന്‍ ആണെന്ന് അറിയുന്നതില്‍ രാജ്യം അഭിമാനത്തിലാണെന്നും മോദി പറഞ്ഞു. പാകിസ്ഥാന്‍ പിടിയില്‍ നിന്ന് മോചിതനായി അഭിനന്ദന്‍ മോചിതനായി എത്തുന്ന അതേ മണക്കൂറുകളില്‍ തന്നെയാണ് മോദി തമിഴ്‌നാട്ടില്‍ പ്രസംഗിച്ചത്. 

2004മുതല്‍ 2014വരെ രാജ്യത്ത് നടന്ന ഭീകരാക്രമണങ്ങളില്‍ നടപടി വേണമെന്ന് ജനങ്ങള്‍ ആഗ്രഹിച്ചു. പക്ഷേ അതുണ്ടായില്ല. അത്തരത്തിലുള്ള അവസ്ഥകളില്‍ ഇപ്പോള്‍ രാജ്യം നിസ്സഹായാവസ്ഥയില്‍ ആകില്ലെന്നും
അദ്ദേഹം കൂട്ടിച്ചേര്‍ത്തു. 

2008ല്‍ നടന്ന മുംബൈ ആക്രമണത്തില്‍ പാകിസ്ഥാന് എതിരെ നടപടിയൊന്നുമുണ്ടായില്ല. 26/11 ആക്രമണത്തില്‍ തീവ്രവാദികള്‍ക്ക് എതിരെ നടപടി പ്രതീക്ഷിച്ചു, പക്ഷേ നടന്നില്ല. ഉറി സംഭവിച്ചപ്പോള്‍ എന്താണ് നമ്മുടെ ധീര ജവാന്‍മാര്‍ ചെയ്തത് എന്ന് നിങ്ങള്‍ കണ്ടതാണ്.

26/11ന് മറുപടി നല്‍കാന്‍ എയര്‍ഫോഴ്‌സ് തയ്യാറെടുത്തപ്പോള്‍ യുപിഎ സര്‍ക്കാര്‍ തടഞ്ഞുവെന്ന് മാധ്യമങ്ങള്‍ റിപ്പോര്‍ട്ട് ചെയ്തിരുന്നു, ഇപ്പോള്‍ സായുധസൈന്യത്തിന് അവര്‍ക്ക് വേണ്ടത് ചെയ്യാനുള്ള സ്വാതന്ത്ര്യമുണ്ടെന്നും മോദി പറഞ്ഞു. 

രാജ്യത്തിന് വേണ്ടി പോരാടുന്ന എല്ലാവര്‍ക്കും അഭിവാദ്യങ്ങള്‍ നേരുന്നു, അവരുടെ ജാഗഗ്രതയാണ് നമ്മുടെ രാജ്യത്തെ സംരക്ഷിച്ചു നിര്‍ത്തുന്നതെന്നും മോദി പറഞ്ഞു.