ജനീവ: പൗരത്വ നിയമ ഭേദഗതി രാജ്യത്ത് വലിയ വിവാ​​ദങ്ങൾക്കും പ്രതിഷേധങ്ങൾക്കുമാണ് വഴിയൊരുക്കിയത്. ഇപ്പോഴിതാ നിയമത്തിനെതിരെ ഐക്യരാഷ്ട്ര സഭയും രം​ഗത്തെത്തി. യുഎന്നിന്‍റെ മനുഷ്യാവകാശ വിഭാഗം നിയമത്തിലെ മുസ്ലീങ്ങള്‍ക്കെതിരെയുള്ള വിവേചനം ചൂണ്ടിക്കാട്ടി. പൗരത്വം നല്‍കുന്നതില്‍ നിന്ന് മുസ്ലീങ്ങളെ ഒഴിവാക്കിയത് പുനഃപരിശോധിക്കണമെന്ന് യുഎന്‍ ആവശ്യപ്പെട്ടു.

പൗരത്വ നിയമ ഭേദഗതിയില്‍ തങ്ങള്‍ക്ക് ആശങ്കയുണ്ട്. മുസ്ലീങ്ങള്‍ക്കെതിരെയുള്ള വിവേചനമാണ് നിയമത്തിന്‍റെ അടിസ്ഥാന സ്വഭാവമെന്ന് യുഎന്‍ മനുഷ്യാവകാശ വക്താവ് ജെറമി ലോറന്‍സ് ജനീവയില്‍ മാധ്യമപ്രവര്‍ത്തകരോട് വ്യക്തമാക്കി. വിവേചനപരമായ പൗരത്വ നിയമ ഭേദഗതി സുപ്രീം കോടതി തിരുത്തുമെന്നാണ് പ്രതീക്ഷ. അന്താരാഷ്ട്ര മനുഷ്യാവാകാശ നയങ്ങള്‍ക്കനുസരിച്ച് ഇന്ത്യ പ്രവര്‍ത്തിക്കുമെന്നാണ് പ്രതീക്ഷിക്കുന്നതെന്നും ജെറമി ലോറന്‍സ് പറഞ്ഞു.

നിയമത്തിനെതിരെ രാജ്യത്ത് പ്രക്ഷോഭം കനക്കുകയാണ്. വടക്കുകിഴക്കന്‍ സംസ്ഥാനങ്ങള്‍ക്ക് പുറമെ ഡൽഹിയിലും ബം​ഗാളിലുമൊക്കെ വലിയ പ്രതിഷേധങ്ങളാണ് ഉയരുന്നത്.