ചണ്ഡീഗഡ്: വാഹനം തടഞ്ഞുനിര്‍ത്തി ലക്ഷങ്ങള്‍ തട്ടിയെടുത്ത ശേഷം കാറില്‍ പൂട്ടിയിട്ട് ബിസിനസുകാരനെ തീകൊളുത്തി കൊന്നു. അജ്ഞാതര്‍ക്ക് എതിരെ കേസെടുത്ത പൊലീസ് സിസിടിവി ദൃശ്യങ്ങളുടെ സഹായത്തോടെ പ്രതികളെ പിടികൂടാനുളള ശ്രമത്തിലാണ്.

ഹരിയാനയിലെ ഹിസാറിലാണ് നാടിനെ നടുക്കിയ സംഭവം. ഡിസ്‌പോസബിള്‍ കപ്പ്, പ്ലേറ്റുകള്‍ എന്നിവ നിര്‍മ്മിക്കുന്ന ഫാക്ടറിയുടെ ഉടമയായ രാം മേഹറാണ് ദാരുണമായി കൊല്ലപ്പെട്ടത്. ഹിസാറില്‍ നിന്ന് നാടായ ഡാറ്റ ഗ്രാമത്തിലേക്ക് പോകുന്ന വഴി ചൊവ്വാഴ്ച രാത്രിയാണ് സംഭവം. 

ബാങ്കില്‍ നിന്ന് 11 ലക്ഷം രൂപ എടുത്ത് മടങ്ങുമ്പോള്‍ അക്രമി സംഘം വാഹനം തടഞ്ഞുനിര്‍ത്തുകയായിരുന്നു. പണം കവര്‍ന്ന ശേഷം 35കാരനെ വാഹനത്തിനുളളില്‍ പൂട്ടിയിട്ട് കാറിന് തീകൊളുത്തുകയായിരുന്നുവെന്ന് പൊലീസ് പറയുന്നു. കത്തിക്കരിഞ്ഞ മൃതദേഹം വീട്ടുകാര്‍ തിരിച്ചറിഞ്ഞു. കാറിന്റെ നമ്പര്‍ പ്ലേറ്റ് അനുസരിച്ച് പൊലീസ് വീട്ടുകാരെ വിവരം അറിയിക്കുകയായിരുന്നു.