ന്യൂഡെല്‍ഹി: ബീഫ് കൈവശം വെച്ചെന്നാരോപിച്ച് ഡെല്‍ഹിയില്‍ യുവാവിനെ ട്രെയിനില്‍ വെച്ച് കുത്തിക്കൊന്നു. ഇയാളുടെ ബന്ധുക്കളായ മൂന്നുപേര്‍ക്ക് ആക്രമണത്തില്‍ പരിക്കേറ്റിട്ടുമുണ്ട്. ജുനൈദ് എന്ന യുവാവാണ് കൊല്ലപ്പെട്ടത്. പെരുന്നാള്‍ പ്രമാണിച്ച് ഡെല്‍ഹിയിലെ സാധാര്‍ ബസാറില്‍ നിന്ന് സാധനങ്ങള്‍ വാങ്ങി വീട്ടിലേക്ക് പോകുന്നവരെ ഒരു സംഘം ആക്രമിക്കുകയായിരുന്നു. 

ട്രെയിനില്‍ സഞ്ചരിക്കുകയായിരുന്ന ജുനൈദിനേയും സഹോദരന്‍മാരായ ഹാഷിമിനെയും ഷാക്കിറിനെയും സഹയാത്രികര്‍ ആക്രമിക്കുകയും പിന്നീട് യാത്രക്കാരിലൊരാള്‍ കത്തിയെടുത്ത് കുത്തുകയുമായിരുന്നു. പരുക്കേറ്റവരെ ആശുപത്രിയിലേക്ക് കൊണ്ടുപോയെങ്കിലും ഒരാള്‍ മരിച്ചുവെന്ന് പൊലീസ് ഉദ്യോഗസ്ഥന്‍ പറഞ്ഞു. പരിക്കേറ്റ ഹാഷിമിന്റെ പരാതിയെത്തുടര്‍ന്ന് പോലീസ് കേസെടുത്തിട്ടുണ്ട്.