അഹമ്മദാബാദ്: ഭരണത്തിലേറിയാല്‍ പട്ടേല്‍ വിഭാഗത്തിന് സംവരണം അനുവദിക്കുമെന്ന് കോണ്‍ഗ്രസ് ഉറപ്പു നല്‍കിയതായി പട്ടേല്‍ സമരസമിതി നേതാവ് ഹാര്‍ദിക് പട്ടേല്‍. സംവരണ കാര്യത്തില്‍ തീരുമാനമായതോടെ കോണ്‍ഗ്രസും പാടിദാറുമായി ധാരണയിലെത്തിയെന്നും അഹമ്മദാബാദില്‍ നടന്ന പത്രസമ്മേളനത്തില്‍ അദ്ദേഹം പറഞ്ഞു. 

കോണ്‍ഗ്രസ് ഞങ്ങളുടെ പ്രശ്‌നങ്ങള്‍ അംഗീകരിച്ചെന്നും പാടിദാറിന് സംവരണം നല്‍കുമെന്ന് ഉറപ്പുനല്‍കിയിട്ടുണ്ടെന്നും ഹാര്‍ദിക് വ്യക്തമാക്കി. നിലവില്‍ എസ്‌സി/ എസ്ടി/ഒബിസി എന്നിവയ്ക്കുള്ള 49 ശതമാനം റിസര്‍വേഷനില്‍ മാറ്റമില്ലാതെയായിരിക്കും പട്ടേലിന് സംവരണം നല്‍കുന്നതെന്നും അദ്ദേഹം കൂട്ടിച്ചേര്‍ത്തു. 

സംസ്ഥാനത്തിന്റെ മൊത്തം ജനസംഖ്യയില്‍ 12 ശതമാനം വരുന്ന പട്ടേല്‍ വിഭാഗത്തിന് തെരഞ്ഞെടുപ്പില്‍ വലിയ സ്വാധീനം ചെലുത്താനാകും. അടുത്ത മാസം നടക്കുന്ന 182 അംഗ അസംബ്ലിയിലെ 60 സീറ്റുകളിലെ വിജയത്തില്‍ പട്ടേലിന്റെ പിന്തുണ കോണ്‍ഗ്രസിന് ഗുണം ചെയ്യും. സ്ഥാനാര്‍ഥിത്തം സംബന്ധിച്ച് കോണ്‍ഗ്രസുമായി ധാരണയായിട്ടില്ലെന്നും സംവരണം കൊണ്ടുവരുന്നതു വരെ പാടിദാര്‍ അനാമത് അന്തോളന്റെ പ്രവര്‍ത്തനം തുടരുമെന്നും ഹാര്‍ദിക് വ്യക്തമാക്കി.