ഗാങ്‌ടോക്ക്:  സിക്കിമിലെ നാഥുലാ ചുരത്തില്‍ കുടുങ്ങിയ 2500 ല്‍ അധികം വിനോദ സഞ്ചാരികള്‍ക്ക് സൈനികര്‍ രക്ഷകരായി. ഇന്തോ- ചൈന അതിര്‍ത്തി പ്രദേശമായ ഇവിടെ സന്ദര്‍ശിക്കാനെത്തിയവരാണ് അപ്രതീക്ഷിതമായുണ്ടായ കനത്ത മഞ്ഞില്‍ കുടുങ്ങിയത്. സ്ത്രീകളും കുട്ടികളുമടങ്ങുന്ന സംഘങ്ങള്‍ക്ക് ഭക്ഷണവും താമസവും കമ്പിളിയും സൈന്യം നല്‍കിയതായി പ്രതിരോധ മന്ത്രാലയ വക്താവ് അറിയിച്ചു.

300-400 വാഹനങ്ങളിലായാണ് സഞ്ചാരികള്‍ എത്തിയത്.  രക്ഷപെടുത്തിയവരില്‍ 1500 പേരെ 17-ാം മൈലിലും ബാക്കിയുള്ളവരെ 13 മൈലിലുമാണ് താമസിപ്പിച്ചിരിക്കുന്നത്.

ആരെങ്കിലും വഴി തെറ്റിപ്പോയി മഞ്ഞില്‍ കുടുങ്ങിയിട്ടുണ്ടോ എന്ന് അന്വേഷിച്ച് വരികയാണെന്നും ആശങ്കപ്പെടേണ്ട സാഹചര്യമില്ലെന്നും സൈന്യം വെളിപ്പെടുത്തി.