ന്യൂഡല്‍ഹി: മദ്യലഹരിയില്‍ ഇടിച്ചിട്ട സ്ത്രീയുടെ മുകളില്‍ കൂടി കാര്‍ കയറ്റി ഇറക്കി എസ്‌ഐ. ന്യൂഡല്‍ഹിയിലെ ചില ഗ്രാമത്തിലാണ് നടുക്കുന്ന സംഭവം നടന്നത്.

തിരക്കുള്ള തെരുവില്‍ റോഡ് മുറിച്ചുകടന്ന സ്ത്രീയെ കാര്‍ ഇടിച്ചിട്ടു. നാട്ടുകാര്‍ ഓടിവന്ന് രക്ഷപ്പെടുത്താന്‍ ശ്രമിക്കുന്നതിനിടെ പൊലീസുകാരന്‍ കാര്‍ മുന്നോട്ടെടുത്ത് ഇവരുടെ ദേഹത്തുകൂടി കയറ്റി ഇറക്കി പോവുകയായിരുന്നു. സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്.

രക്ഷപ്പെടാന്‍ ശ്രമിച്ച പൊലീസ് ഉദ്യോഗസ്ഥനെ നാട്ടുകാര്‍ പിടികൂടി. ഗുരുതരമായി പരിക്കേറ്റ സ്ത്രീ ആശുപത്രിയില്‍ ചികിത്സയിലാണ്. 56കാരനായ യോഗേന്ദ്ര എന്ന സബ് ഇന്‍സ്‌പെക്ടറാണ് അപകടമുണ്ടാക്കിയതെന്ന് പൊലീസ് വ്യക്തമാക്കി. ഇയാളെ പൊലീസ് അറസ്റ്റ് ചെയ്തു.