റാഞ്ചി: മന്ത്രസിദ്ധി കിട്ടുന്നതിന് അമ്മായിയമ്മയെ കൊന്നു രക്തം കുടിച്ച യുവാവ് അറസ്റ്റില്‍. റാഞ്ചിയിലെ രംഗമതി ഗ്രാമത്തിലാണ് നാടിനെ നടുക്കിയ സംഭവമുണ്ടായത്.

ഫലീന്ദ്ര ലോറ എന്ന മുപ്പതുകാരനാണ് അറസ്റ്റിലായതെന്നു പൊലീസ് പറഞ്ഞു. ഭാര്യയുടെ മാതാവ്, നാല്‍പ്പത്തിയഞ്ചു വയസുള്ള ശകുരി ദേവിയെയാണ് ഫലീന്ദ്ര കൊലപ്പെടുത്തിയത്. ഭാര്യാപിതാവ് പര്‍ന ലോറയാണ് സംഭവം പൊലീസില്‍ അറിയിച്ചത്.

മന്ത്രസിദ്ധി കിട്ടുന്നതിനാണ് അമ്മായിയമ്മയെ കൊലപ്പെടുത്തിയതെന്ന് ഫലീന്ദ്ര പൊലീസിനോടു പറഞ്ഞു. മൂര്‍ച്ചയേറിയ കത്തി ഉപയോഗിച്ചു കൊലപ്പെടുത്തിയ ശേഷം രക്തം കുടിക്കുകയായിരുന്നു. പെട്ടെന്നു മുറിയിലേക്കു കയറിവന്ന പര്‍നയെ കണ്ടപ്പോള്‍ ഫലീന്ദ്ര ഓടി രക്ഷപ്പെടുകയായിരുന്നു. പിന്നീടാണ് പൊലിസ് ഇയാളെ അറസ്റ്റ് ചെയ്തത്. 

ഭാര്യാമാതാവിന്റെ രക്തത്തിനൊപ്പം ഒരു താറാവിന്റെയും എരുമക്കുട്ടിയുടെയും രക്തം ഇയാള്‍ കുടിച്ചിരുന്നു. കഴുത്തു വേര്‍പെട്ട താറാവിനെ മുറിയില്‍നിന്നു കണ്ടെടുത്തു. എരുമക്കുട്ടി കഴുത്തിനു മുറിവേറ്റ നിലയിലായിരുന്നു.