ചെന്നൈ: മാധ്യമപ്രവര്‍ത്തകയെ 'സുന്ദരി' എന്നുവിളിച്ച തമിഴ്നാട് ആരോ​ഗ്യമന്ത്രിയുടെ നടപടി വിവാദത്തിൽ. വ്യാഴാഴ്ച എഐഎഡിഎംകെ എംഎൽഎമാരുടെ യോഗത്തിനുശേഷം പുറത്തെത്തിയ മന്ത്രിയോട് മാധ്യമപ്രവർത്തകർ ചോദ്യമുന്നയിക്കുന്നതിനിടെ ആണ് ദൃശ്യമാധ്യമ പ്രവര്‍ത്തകയെ ആരോഗ്യമന്ത്രി സി വിജയഭാസ്‌കര്‍ സുന്ദരിയെന്ന് വിളിച്ചത്.

ചോദ്യത്തിന് ഉത്തരം നല്‍കാതെ 'നിങ്ങളുടെ കണ്ണട ഭംഗിയുള്ളതാണെന്ന്' മാധ്യമപ്രവര്‍ത്തകയോട് പറഞ്ഞാണ് തുടക്കം. പിന്നീട് പലതവണ സുന്ദരി എന്ന് മന്ത്രി വിളിച്ചു.  ക്യാമറയില്‍ പകര്‍ത്തിയ മന്ത്രിയുടെ പെരുമാറ്റം വെള്ളിയാഴ്ച ചാനലുകൾ പുറത്തുവിട്ടതോടെയാണ് വിവാദം കൊഴുത്തത്. വൈകീട്ട് മാധ്യമപ്രവര്‍ത്തകര്‍ മന്ത്രിയുടെ വീടിനുമുന്നില്‍ പ്രതിഷേധം സംഘടിപ്പിച്ചു. 

സംഭവം വിവാദമായതോടെ, മാപ്പു പറഞ്ഞ് മന്ത്രി വിഷയത്തിൽ നിന്ന് തലയൂരി. രാഷ്ട്രീയം സംബന്ധിച്ച ചോദ്യങ്ങളില്‍നിന്ന് ഒഴിഞ്ഞുമാറാനാണ് ഇങ്ങനെ ചെയ്തത്.  തന്റെ പ്രവൃത്തി ആരെയെങ്കിലും വേദനിപ്പിച്ചുണ്ടെങ്കില്‍ മാപ്പുനല്‍കണമെന്നും മന്ത്രി വ്യക്തമാക്കി.