ന്യൂഡല്‍ഹി: മൂന്ന് വര്‍ഷം മുന്‍പ് ഇറാഖില്‍ ഐഎസ് തീവ്രവാദികള്‍ ബന്ദികളാക്കിയ 39 ഇന്ത്യക്കാരും ജീവനോടെ ഉണ്ടെന്ന സൂചന നല്‍കി കേന്ദ്ര വിദേശകാര്യ മന്ത്രി സുഷമ സ്വരാജ്. ബന്ദികളാക്കപ്പെട്ടവരുടെ കുടുംബാംഗത്തേയാണ്‌ സുഷമ ഇക്കാര്യം അറിയിച്ചത്. 

ഇവര്‍ ഐഎസിന്റെ നിയന്ത്രണത്തിലുള്ള മൊസൂള്‍ മേഖലയില്‍ തന്നെയുണ്ടാകാനാണ് സാധ്യതയെന്ന് സുഷമ പറഞ്ഞതായാണ് ബന്ദികളില്‍ ഒരാളുടെ കുടുംബാംഗമായ ഗുര്‍പീന്ദര്‍ കൗര്‍ പറയുന്നത്. 

2014 ജൂണ്‍ 11ന് ആയിരുന്നു മൊസൂളില്‍ നിന്നും ഇസ്ലാമിക് സ്റ്റേറ്റ് ഭീകരവാദികള്‍ 39 ഇന്ത്യക്കാരെ തട്ടിക്കൊണ്ടുപോയത്. എന്നാല്‍ ബന്ദികളുടെ മോചനത്തെ കുറിച്ച് കേന്ദ്ര സര്‍ക്കാര്‍ ഇതുവരെ പ്രതികരിച്ചിരുന്നില്ല. 

ഐഎസിന്റെ പക്കല്‍ നിന്നും മൊസൂളിന്റെ ഭൂരിഭാഗം പ്രദേശങ്ങളും ഇറാഖി സേന തിരിച്ചു പിടിച്ചെങ്കിലും ബന്ദികളാക്കപ്പെട്ട ഇന്ത്യക്കാരെ കണ്ടെത്താന്‍ സാധിച്ചിരുന്നില്ല.