ന്യൂഡല്ഹി: രാജ്യത്ത് മൊബൈല് ഫോണിന്റെയും ഇലക്ട്രോണിക് ഉപകരണങ്ങളുടെയും ഉത്പാദനം വര്ധിപ്പിക്കാന് പ്രത്യേക പദ്ധതി പ്രഖ്യാപിക്കുമെന്ന് ധനമന്ത്രി നിര്മല സീതാരാമന്. ആഗോള ഉത്പാദക ശൃഖലയില് ഇന്ത്യ ഭാഗമാവുന്നതോടെ തൊഴിലവസരങ്ങള് വര്ധിപ്പിക്കാനാവുമെന്ന് ബജറ്റ് പ്രസംഗത്തില് ധനമന്ത്രി പറഞ്ഞു.
മൊബൈല് ഫോണുകള്, ഇലക്ട്രോണിക് ഉത്പന്നങ്ങള്, സെമി കണ്ടക്ടര് പാക്കേജിങ് എന്നിവയുടെ നിര്മാണം വര്ധിപ്പിക്കാന് ലക്ഷ്യമിട്ട് പ്രത്യേക പദ്ധതി മുന്നോട്ടുവയ്ക്കുന്നു. ഇതിന്റെ വിശദാംശങ്ങള് ഉടന് പ്രഖ്യാപിക്കുമെന്ന് ധനമന്ത്രി അറിയിച്ചു.
ചെറിയ മാറ്റങ്ങളോടെ ഈ പദ്ധതിയില് തന്നെ മെഡിക്കല് ഉപകരണങ്ങളും നിര്മിക്കാനാവുമെന്ന് നിര്മല സീതാരാമന് പറഞ്ഞു. ആഭ്യന്തര തലത്തില് ഉത്പാദനം വര്ധിപ്പിക്കുന്നതിനുള്ള പദ്ധതിയിലൂടെ കൂടുതല് നിക്ഷേപം ആകര്ഷിക്കാനാവും. അതുവഴി കൂടുതല് തൊഴിലവസരങ്ങള് സൃഷ്ടിക്കപ്പെടുമെന്ന് ധനമന്ത്രി അറിയിച്ചു.
സംരഭകത്വമാണ് ഇന്ത്യയുടെ ശക്തി. കൂടുതല് സംരഭകരെ സൃഷ്ടിക്കാന് കൂടുതല് പേരെ ഈ മേഖലയിലേക്ക് ആകര്ഷിക്കേണ്ടതുണ്ട്. സംരഭകരെ ആകര്ഷിക്കാന് ഇന്വൈസ്റ്റ്മെന്റ് ക്ലിയറന്സ് സെല്ലിന് രൂപം നല്കുമെന്ന് ബജറ്റ് നിര്ദേശിക്കുന്നു.
നിക്ഷേപത്തിന് മുന്പ് നിര്ദേശങ്ങളും ഉപദേശങ്ങളും നല്കാന് പാകത്തിനുളള സംവിധാനമാണ് ഒരുക്കുന്നത്. വാണിജ്യ, വ്യവസായ മേഖലയുടെ വളര്ച്ചയ്ക്ക് 27300 കോടി രൂപ നീക്കിവെച്ചതായി നിര്മ്മല സീതാരാമന് പറഞ്ഞു. റെയില്വേ ട്രാക്കിന് സമീപമുളള റെയില്വേയുടെ സ്ഥലത്ത് സോളാര് പാനലുകള് സ്ഥാപിക്കുമെന്നും നിര്മ്മല പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates