ന്യൂഡല്‍ഹി: സമീപകാലത്ത് സമൂഹമാധ്യമങ്ങളില്‍ വ്യാപകമായി പ്രചരിച്ച ഒന്നായിരുന്നു നരേന്ദ്ര മോദി മേക്കപ്പ് ചെയ്യുന്നതിന്റെ ദൃശ്യങ്ങള്‍. മോദിയുടെ ബ്യൂട്ടീഷന് ഒരു മാസം ലഭിക്കുന്ന ശമ്പളം 80 ലക്ഷമാണെന്ന തലക്കെട്ടോടെയാണ് വീഡിയോകള്‍ പ്രചരിക്കുന്നത്. എന്നാല്‍ ഈ പ്രചരണം വ്യാജമാണെന്നാണ് കണ്ടെത്തല്‍

മോദി സോഫയില്‍ ഇരിക്കുന്നതും , കുറച്ച് പേര്‍ മോദിയുടെ അളവെടുക്കുന്നതും, ചിത്രങ്ങളെടുക്കുന്നതുമൊക്കെയാണ് ദൃശ്യങ്ങളില്‍ കാണിച്ചിരിക്കുന്നത്. അലോക് തിവാരിയാണ് മോദിയുടെ ബ്യൂട്ടീഷന് ഒരു മാസം ലഭിക്കുന്ന ശമ്പളം 80 ലക്ഷമാണെന്ന തലക്കെട്ടോടെ ഈ ദൃശ്യങ്ങള്‍ പങ്കുവെച്ചിരിക്കുന്നത്. 16,000 ല്‍ അധികം തവണയാണ് ഈ വീഡിയോ അലോകിന്റെ അക്കൗണ്ടില്‍ നിന്ന് മാത്രം പങ്കുവെച്ചിരിക്കുന്നത്. ഇതിന് പുറമെ വാട്ട്‌സാപ്പ്, ഫേസ്ബുക്കിലെ വിവിധ അക്കൗണ്ടുകള്‍ എന്നിവയിലൂടെയും വീഡിയോ ഈ തലക്കെട്ടോടെ തന്നെ പങ്കുവെക്കപ്പെട്ടിട്ടുണ്ട്.

ദൃശ്യം വ്യാജമല്ലെങ്കിലും, ദൃശ്യത്തിനൊപ്പം പോസ്റ്റ് ചെയ്തിരിക്കുന്ന തലക്കെട്ടാണ് പ്രശ്‌നക്കാരന്‍. മാഡം തുസോഡ്‌സ് മെഴുക് മ്യൂസിയത്തില്‍ മോദിയുടെ പ്രതിമയുണ്ടാക്കാന്‍ വേണ്ടിയായിരുന്നു ഈ അളവെടുപ്പുകളെല്ലാം. ദൃശ്യത്തില്‍ മോദിക്കൊപ്പം കാണുന്നവര്‍ മോദിയുടെ ബ്യൂട്ടീഷന്മാരല്ല, മറിച്ച് മാഡം തുസോഡ്‌സിലെ ജീവനക്കാരാണെന്നതാണ് വസ്തുത