ബംഗളൂരു: ദളിത് നേതാവും ​ഗുജറാത്ത് എംഎൽഎയുമായ ജി​ഗ്നേഷ് മേവാനിക്കെതിരെ കേസെടുത്തു. കർണാടകയിലെ ചിത്രദുർ​ഗ പൊലീസാണ് കേസ് രജിസ്റ്റർ ചെയ്തത്. കർണാടകത്തിൽ പ്രധാനമന്ത്രി നരേന്ദ്രമോദിയുടെ തിരഞ്ഞെടുപ്പ് റാലി അലങ്കോലമാക്കാൻ ജി​ഗ്നേഷ് മേവാനി ആഹ്വാനം നൽകിയെന്ന ബിജെപിയുടെ പരാതി പ്രകാരമാണ് കേസെടുത്തത്. 

ചിത്രദുർ​ഗയിൽ വാർത്താസമ്മേളനത്തിലാണ് ജി​ഗ്നേഷ് മേവാനി, മോദി വാ​ഗ്ദാനം ചെയ്ത രണ്ട് കോടി പേർക്ക് തൊഴിൽ  എന്ന പ്രഖ്യാപനം എന്തായെന്ന് ചോദിച്ച് പ്രശ്നമുണ്ടാക്കാൻ കർണാടകയിലെ യുവാക്കളോട് ആവശ്യപ്പെട്ടത്. 15 ന് ബം​ഗളൂരുവിൽ നടക്കുന്ന പ്രധാനമന്ത്രിയുടെ തിരഞ്ഞെടുപ്പ് റാലിയിൽ കടന്നുചെല്ലണം. കസേരകൾ എടുത്തെറിഞ്ഞ്, മോദിയോട് വാ​ഗ്ദാനം ചെയ്ത ജോലി എവിടെ എന്ന് ചോദിക്കണം. ജി​ഗ്നേഷ് മേവാനി ആവശ്യപ്പെട്ടു. 

ജി​ഗ്നേഷ് മേവാനിയുടേത് പ്രധാനമന്ത്രിയുടെ റാലി അലങ്കോലമാക്കാനുള്ള ആഹ്വാനമാണെന്ന് ചൂണ്ടിക്കാട്ടി ബിജെപി ചിത്രദുർ​ഗ ജില്ലാ പ്രസിഡന്റ് കെ എസ് നവീനാണ് പൊലീസിൽ പരാതി നൽകിയത്. ഇക്കാര്യം ചൂണ്ടിക്കാട്ടി കേന്ദ്ര തെരഞ്ഞെടുപ്പ് കമ്മീഷനും ബിജെപി പരാതി നൽകിയിട്ടുണ്ട്.