ജയ്പുര്‍: ആര്‍എസ്എസ് മേധാവി മോഹന്‍ ഭഗവതിന് അകമ്പടി സേവിച്ച കാര്‍ ഇരുചക്ര വാഹനവുമായി കൂട്ടിയിടിച്ച് ആറ് വയസുകാരന്‍ മരിച്ചു. ബുധനാഴ്ച രാത്രി രാജസ്ഥാനിലെ അല്‍വാറിലായിരുന്നു സംഭവം. മണ്ഡവാര്‍ സ്വദേശി സച്ചിനാണ് മരിച്ചത്. പരുക്കേറ്റ സച്ചിന്റെ മുത്തച്ഛനെ ആശുപത്രിയില്‍ പ്രവേശിപ്പിച്ചു.

തിജാരയില്‍ പൊതുച്ചടങ്ങില്‍ പങ്കെടുത്ത ശേഷം മോഹന്‍ ഭഗവത് മടങ്ങുമ്പോഴായിരുന്നു അപകടം. അദ്ദേഹത്തിന് അകമ്പടി സേവിച്ച വാഹനങ്ങളില്‍ ഒന്ന് സച്ചിനും മുത്തച്ഛനും സഞ്ചരിച്ച ഇരുചക്ര വാഹനവുമായി കൂട്ടിയിടിക്കുകയായിരുന്നു.

സംഭവത്തില്‍ കാര്‍ െ്രെഡവര്‍ക്കെതിരെ കേസ് റജിസ്റ്റര്‍ ചെയ്തതായും വാഹനം ഉടന്‍ കസ്റ്റഡിയില്‍ എടുക്കുമെന്നും മാണ്ഡവാര്‍ എസ്‌ഐ റാംസ്വരൂപ് ബൈരവ പറഞ്ഞു. ഇസഡ് പ്ലസ് സുരക്ഷ ഉള്ള ആളാണ് മോഹന്‍ ഭഗവത്. പത്തോളം കാറുകളാണ് അദ്ദേഹത്തിന് അകമ്പടി സേവിച്ചിരുന്നത്.