മുംബൈ: ബോളിവുഡിലെ പ്രമുഖ നടി ഊര്‍മ്മിള മണ്ഡോദ്ക്കര്‍ കോണ്‍ഗ്രസ് സ്ഥാനാര്‍ത്ഥിയാകുമെന്ന് റിപ്പോര്‍ട്ടുകള്‍. മുംബൈ നോര്‍ത്ത് സീറ്റില്‍ മത്സരിച്ചേക്കും. രംഗീല എന്ന ചിത്രത്തിലെ അഭിനയത്തിലൂടെ ഏറെ ആരാധകരുളള നടിയാണ് ഊര്‍മ്മിള. ബിജെപിയുടെ സിറ്റിംഗ് എംപിയായ ഗോപാല്‍ ഷെട്ടിയാകും എതിരാളി.

ഊര്‍മ്മിളയും ഭര്‍ത്താവും കോണ്‍ഗ്രസില്‍ ചേരുമെന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു. അതിന് പിന്നാലെയാണ് മുംബൈ നോര്‍ത്തില്‍ സ്ഥാനാര്‍ത്ഥിയായേക്കുമെന്ന അഭ്യൂഹം ശക്തമായത്. പ്രഖ്യാപനം അടുത്ത ദിവസമുണ്ടായേക്കുമെന്ന് കോണ്‍ഗ്രസ് വൃത്തങ്ങള്‍ വ്യക്തമാക്കി. ബിജെപിക്കും ശിവസേനയ്ക്കും ഏറെ ശക്തിയുള്ള മണ്ഡലമാണ് മുംബൈ നോര്‍ത്ത്.

2014ലെ തെരഞ്ഞടുപ്പില്‍ കോണ്‍ഗ്രസ് സ്ഥാനാര്‍ത്ഥിയും സിറ്റിംഗ് എംപിയുമായ സഞ്ജയ് നിരുപത്തിനെ 4,46,000 വോട്ടുകള്‍ക്കാണ് ബിജെപി സ്ഥാനാര്‍ത്ഥി ഗോപാല്‍ ഷെട്ടി പരാജയപ്പെടുത്തിയത്.