ന്യൂഡല്‍ഹി:  കൈക്കൂലിക്കേസില്‍ സിബിഐ സ്‌പെഷ്യല്‍ ഡയറക്ടര്‍ രാകേഷ് അസ്താനയെ അറസ്റ്റ് ചെയ്യുന്നത് ഡല്‍ഹി ഹൈക്കോടതി തടഞ്ഞു. തിങ്കളാഴ്ച കേസ് പരിഗണിക്കുന്നത് വരെ അസ്താനയെ അറസ്റ്റ് ചെയ്യരുതെന്നാണ് കോടതി നിര്‍ദ്ദേശിച്ചിരിക്കുന്നത്. കേസുമായി ബന്ധപ്പെട്ട എല്ലാ ഇലക്ട്രോണിക് രേഖകളും സംരക്ഷിക്കണമെന്നും കോടതി ആവശ്യപ്പെട്ടിട്ടുണ്ട്. കള്ളപ്പണം വെളുപ്പിക്കല്‍ കേസില്‍ അറസ്റ്റിലായ മൊയിന്‍ ഖുറേഷിക്കെതിരായ കേസില്‍ പേര് പരാമര്‍ശിക്കാതിരിക്കാന്‍ അസ്താന രണ്ട് കോടി രൂപ കൈക്കൂലി വാങ്ങിയെന്നാണ് സതീഷ് സേനയുടെ പരാതി. 

 കേസ് നടപടികള്‍ റദ്ദാക്കണമെന്ന അസ്താനയുടെ ആവശ്യം കോടതി തള്ളി. ഗൂഢാലോചനയുടെ ഇരയാണ് താനെന്നും സതീഷ് സേനയില്‍ നിന്ന് താന്‍ പണം വാങ്ങിയിട്ടില്ലെന്നും സിബിഐ മേധാവി അലോക് വര്‍മ്മയാണെന്നും അസ്താന ആരോപിച്ചിരുന്നു. അസ്താന ഉന്നയിച്ച ആരോപണങ്ങളില്‍ സിബിഐ ഡയറക്ടര്‍ മറുപടി നല്‍കണമെന്നും കോടതി ആവശ്യപ്പെട്ടിട്ടുണ്ട്. 

ഡല്‍ഹി ഹൈക്കോടതി ചീഫ് ജസ്റ്റിസ് രാജേന്ദ്ര മേനോന്റെ മുന്‍പാകെയാണ് അസ്താന ഇന്ന് ഉച്ചയ്ക്ക് ഹര്‍ജി സമര്‍പ്പിച്ചത്.