ന്യൂഡല്‍ഹി: ചുമച്ചപ്പോള്‍ കൊറോണയുണ്ടെന്ന് കളിയാക്കിയ സുഹൃത്തിന് നേരേ യുവാവ് വെടിയുതിര്‍ത്തു. ലു‍ഡോ കളിക്കുന്നതിനിടെയാണ് സു​ഹൃത്തിന് നേരെ യുവാവ് നിറയൊഴിച്ചത്. കാലിന് വെടിയേറ്റ യുവാവിനെ പരിക്കുകളോടെ ആശുപത്രിയില്‍ പ്രവേശിപ്പിച്ചു. വെടിവെച്ചയാള്‍ സംഭവത്തിന് പിന്നാലെ ഓടി രക്ഷപ്പെട്ടു. 

​ഗ്രെയ്റ്റര്‍ നോയിഡയിലെ ഒരു ക്ഷേത്ര വളപ്പില്‍ ചൊവ്വാഴ്ച രാത്രിയായിരുന്നു സംഭവം. ലോക്ക്ഡൗണിനിടെയാണ് നാല് സുഹൃത്തുക്കള്‍ ലുഡോ കളിക്കാനായി ക്ഷേത്ര വളപ്പിലെത്തിയത്. 

കളിക്കുന്നതിനിടെ സുരേഷ് (യഥാര്‍ഥ പേരല്ല) എന്നയാള്‍ നിര്‍ത്താതെ ചുമച്ചു. ഇതു ശ്രദ്ധിച്ച സുഹൃത്തായ പ്രതീക് (യഥാര്‍ഥ പേരല്ല)  കൊറോണയുള്ളവരുടെ ചുമയാണെന്നും കൊറോണ വൈറസ് ബാധിച്ചിട്ടുണ്ടെന്നും പറഞ്ഞ് കളിയാക്കി. ഇതു കേട്ടയുടന്‍ പ്രകോപിതനായ സുരേഷ് കൈയിലുണ്ടായിരുന്ന തോക്ക് എടുത്ത് പ്രതീകിന് നേരെ വെടിയുതിര്‍ക്കുകയായിരുന്നുവെന്ന് ടൈംസ് നൗ റിപ്പോര്‍ട്ട് ചെയ്തു. 

വെടിയൊച്ച കേട്ട് സമീപവാസികളെല്ലാം ഓടിയെത്തി. തുടര്‍ന്ന് വെടിയേറ്റ് നിലത്തു വീണ പ്രതീകിനെ ​ഗ്രെയ്റ്റർ നോയിഡയിലെ കൈലാഷ് ആശുപത്രിയില്‍ പ്രവേശിപ്പിച്ചു.