ഇന്‍ഡോര്‍ : ലോക്ക്ഡൗണ്‍ ലംഘിച്ച് നിരത്തില്‍ ഇറങ്ങുന്നവരെ പൊലീസ് കടുത്ത ശിക്ഷകള്‍ക്ക് വിധേയരാക്കിയത് ഏറെ വാര്‍ത്തയായിരുന്നു. മധ്യപ്രദേശില്‍ വിജനമായ റോഡിലൂടെ ആഡംബര വാഹനത്തില്‍ കറങ്ങാനിറങ്ങിയ യുവാവിനെ നഗരമധ്യത്തില്‍ പൊലീസ് പിടികൂടി ഏത്തമിടീക്കുന്ന വീഡിയോ സമൂഹമാധ്യമങ്ങളില്‍ വൈറലായിരിക്കുകയാണ്.

മധ്യപ്രദേശിലെ കോവിഡ് തീവ്രബാധിത മേഖലയായ ഇന്‍ഡോര്‍ നഗരത്തിലാണ് പോര്‍ഷെയുടെ ടൂ സീറ്റര്‍  കണ്‍വേര്‍ട്ടബിള്‍ മോഡലിലാണ് യുവാവ് നഗരം ചുറ്റാനിറങ്ങിയത്. നഗരത്തില്‍ പോലീസ് നടത്തിയ പരിശോധനയിലാണ് മതിയായ രേഖകളില്ലാതെ നഗരം ചുറ്റാനിറങ്ങിയ യുവാവ് കുടുങ്ങിയത്.

സുരക്ഷയ്ക്കായി മാസ്‌ക് പോലും ധരിച്ചിട്ടില്ലെന്നും വീഡിയോയില്‍ വ്യക്തമാണ്. ഇന്‍ഡോറിലെ വ്യവസായിയായ ദീപക് ദര്‍യാനിയുടെ മകനാണ് ഈ യുവാവെന്നാണ് റിപ്പോര്‍ട്ട്. പൊലീസ് കൈകാണിച്ചയുടന്‍ വാഹനങ്ങളുടെ രേഖകളുമായി യുവാവ് പുറത്തുവരുന്നതും വീഡിയോയിലുണ്ട്.

എന്നാല്‍, മതിയായ രേഖകള്‍ ഇല്ലെന്ന് ബോധ്യപ്പെട്ടതിനെ തുടര്‍ന്ന് പൊലീസ് ഉദ്യോഗസ്ഥര്‍ അയാളോട് ഏത്തമിടാന്‍ ആവശ്യപ്പെടുകയായിരുന്നു. സംഭവത്തെ തുടര്‍ന്ന് യുവാവിന്റെ ബന്ധുക്കള്‍ പൊലീസിനെതിരേ രംഗത്തെത്തിയിട്ടുണ്ട്. കര്‍ഫ്യൂ പാസും വാഹനരേഖകളും ഇയാളുടെ കൈവശമുണ്ടായിരുന്നെന്നും പൊലീസ് മോശമായി പെരുമാറിയെന്നാണ് ആരോപണം.